الماتىدا ارزان ءارى جايلى پاتەردى قالاي ىزدەپ تابۋعا بولادى؟
وڭتۇستىك استانادا قۇرىلىس قارقىندى. سايكەسىنشە، ۋاقىتشا جاي، جاتاقحانالار، جاڭا سالىنعان ۇيلەر، ەليتالىق اپارتامەنتتەر كوپتەپ كەزدەسەدى.
«دەگەنمەن، ادامدار ۋاقىتشا قونىس ىزدەگەندە ءبىرقاتار كەدەرگىلەرگە تاپ بولادى: قىمبات، الىس، بوس ەمەس، پاتەر «جارناماعا سايكەس ەمەس». وسىلاي اپتالاپ ىزدەپ ءجۇرىپ، اقىرى قالاۋىنا ساي پاتەر تابا المايدى. مۇنداي ساتسىزدىكتەردىڭ سەبەبى دە سان الۋان: دۇرىس ىزدەمەۋ، اقشانىڭ جەتىسپەۋشىلىگى، از ۋاقىتتا كوشۋ، كەلىسىمشارت جاساۋ كەزىندە مۇقيات بولماۋ ت. ب »، - دەيدى اۆتور ءوز سوزىندە.
سوندىقتان پاتەر ىزدەۋگە كىرىسپەس بۇرىن الدىمەن مىنا نارسەلەردى ناقتىلاپ الۋعا كەڭەس بەرەدى. ولار: بيۋدجەت، اۋدانى، اۋماعى، مەرزىمى، ينفراقۇرىلىمى. «ءسىز ءۇشىن ماڭىزدى جانە ەكىنشى رەتتەگى دۇنيەلەردى ايقىنداپ الۋ شارت. ساۋدا مونيتورينگىن باقىلاپ وتىرۋدى دا ۇمىتپاعان ءجون»، - دەيدى ول.
نارىق مونيتورينگىنە سايكەس، 2019 -جىلى 22 - تامىزدا الماتىدا 1 شارشى مەتردى جالعا الۋ قۇنى ورتاشا ەسەپپەن 2460 تەڭگەنى قۇرادى. سوڭعى جىلدارى باعا ايتارلىقتاي وسە قويعان جوق. الماتىدا جالعا بەرۋ قۇنى تومەن باسپانالار تۇركسىب اۋدانى (1700 تەڭگە/شارشى مەتر)، جەتىسۋ اۋدانى (1800 تەڭگە/شارشى مەتر) جانە ناۋرىزباي اۋدانىندا (1850 تەڭگە/شارشى مەتر) ورنالاسقان.
ءبىر بولمەلى پاتەرلەر قالانىڭ وسى اتالعان اۋماقتارىندا 60000- 70000 تەڭگەدەن باستالادى. ەكى بولمەلى پاتەرلەر 80000- 90000 تەڭگە ارالىعىندا. ءۇش بولمەلىلەر 95000-نان باستالىپ، 120000-عا دەيىن بارادى. ال ورتاشا باعا اۋەزوۆ پەن المالى اۋداندارىندا تىركەلگەن. مۇندا ءبىر شارشى مەتردىڭ قۇنى 2500 تەڭگە تۇرادى.
ەڭ جوعارعى باعا بوستاندىق (3450 ت گ/ش. م) پەن المالى اۋداندارىنىڭ ءبىر بولىگىندە (3000 ت گ/ش.م). «التىن كۆادرات» اتالىپ كەتكەن (گوگول - سەيفۋللين - قالداياقوۆ - اباي) ايماقتا جالعا بەرىلەتىن پاتەردىڭ ءبىر شارشى مەترى 3400 تەڭگەدەن باستالادى. ايىنا 130000 تەڭگەگە جالعا بەرىلەتىن 1-2 بولمەلى پاتەردى تابۋدىڭ ءوزى قيىن.
سونداي- اق، ماقالادا پاتەر ىزدەۋ شارالارىن ناتيجەلى ەتۋدىڭ نەگىزگى پرينتسيپتەرى رەتىندە تالاپ قويۋ كەزىندە وبەكتيۆتى بولۋ، نارىققا مونيتورينگ جاساپ وتىرۋ جانە دەر كەزىندە شەشىم قابىلداي ءبىلۋ ەكەندىگى ايتىلعان.
«سايتتا جاڭا حابارلامالار ءجيى جاريالانادى. سول سەبەپتى دە جوعالىپ كەتپەس ءۇشىن ونى «تاڭداۋلىعا» قويىپ، ءۇي يەسىنە دەرەۋ قوڭىراۋ شالعان ابزال»، - دەيدى اۆتور.
www.24.kz