ونداي قوڭىراۋلاردىڭ بولعانىن جاسىرمايمىز - ابايەۆ شەنەۋنىكتەردىڭ ب ا ق- قا قىسىمى جايلى

نۇر- سۇلتان. قازاقپارات - اقپارات جانە قوعامدىق دامۋ ءمينيسترى داۋرەن ابايەۆ ەلباسىنىڭ ب ا ق پەن شەنەۋنىكتەر اراسىنداعى قاتىناستارىنا قاتىستى سوزىنە پىكىر ءبىلدىردى، دەپ حابارلايدى قازاقپارات ءتىلشىسى.

«تەلەفون قوڭىراۋلارى» تۋرالى: ءبىز بەلگىلى ءبىر تالداۋ جۇمىستارىن جۇرگىزەمىز. باس رەداكتورلارمەن بالكىم بىرىگىپ، قانشا قوڭىراۋدىڭ كەلگەنىن ايقىنداۋ كەرەك بولار. ءبىز مۇنداي جاعدايلاردىڭ قالايدا بولعانىن جاسىرمايمىز. دەسە دە، قوڭىراۋلاردىڭ كوبى مەملەكەتتىك ورگانداردىڭ پوزيتسياسىن تۇسىندىرۋگە قاتىستى بولعانىنا ءشۇبا كەلتىرمەيمىن. دەمەك، كەيدە جۋرناليستەر كەمشىلىككە نەمەسە قاتەلىككە جول بەرۋى مۇمكىن. تيىسىنشە، مەملەكەتتىك ورگاندار ولارعا حابارلاسىپ، ءتۇسىندىرۋى، پىسىقتاۋى ىقتيمال. ەلباسى دا، مەملەكەت باسشىسى دا اتاپ وتكەندەي، ءبىزدىڭ ەلدىڭ دامۋى ەركىن ب ا ق- سىز مۇمكىن ەمەس. ءدال تىلشىلەر - مەملەكەتتىك ورگاندار نازار اۋدارۋى ءتيىس ماسەلەلەردى مەڭزەيتىن ماماندار بولىپ سانالادى» ، - دەدى داۋرەن ابايەۆ ۇكىمەتتىڭ باسپا ءسوز ورتالىعىندا.

ەسكە سالا كەتسەك، شەنەۋنىكتەردىڭ ب ا ق رەداكتورلارىنا قىسىم كورسەتەتىنىن «Nur Otan» پارتياسى ساياسي كەڭەسىنىڭ كەڭەيتىلگەن وتىرىسىندا ق ر تۇڭعىش پرەزيدەنتى - ەلباسى نۇرسۇلتان نازاربايەۆ اتاپ وتكەن بولاتىن.

«ءداستۇرلى ب ا ق پوزيتسياسىنان ايىرىلىپ بارادى. داۋرەن ابايەۆ وسى ماسەلە بويىنشا ويلانىپ، جۇمىس جۇرگىزۋى كەرەك. تەلەفوندىق قۇقىق بولماۋى ءتيىس. شەنەۋنىكتەر رەداكتورلارعا قىسىم كورسەتەدى. ءارتۇرلى جولدارمەن سىني ماتەريالداردىڭ جولىن كەسەدى. وسىدان كەيىن قوعامدىق سانادا بالاما شىنايىلىق قالىپتاسادى. «Nur Otan» سول سەبەپتى، ءوزىنىڭ اقپاراتتىق ستراتەگياسىن قايتا قاراۋى كەرەك. پارتيالىق ب ا ق شىنايى ءارى جەدەل اقپاراتتىڭ كوزىنە اينالىپ، وزا جۇمىس جۇرگىزۋى ءتيىس. ەڭ دارىندى ادامداردى تارتىپ، ءتيىستى ايلىق تولەنۋى كەرەك» ، - دەدى ەلباسى.