اباي تانۋشىلار: ەۋروپالىق دەڭگەيدە «اباي تانۋ» ينستيتۋتىن قۇرۋ قاجەت

نۇر-سۇلتان. قازاقپارات - ەۋروپالىق دەڭگەيدە «اباي تانۋ» ينستيتۋتىن قۇرۋ قاجەت. بۇگىن ەلوردادا وتكەن «اباي الەمى» اتتى رۋحاني- تاعىلىمدى كەش بارىسىندا ابايتانۋشىلار وسىنداي ۇسىنىس تاستادى.

عالىمدار ينستيتۋت اشۋعا ۇكىمەتتەن جەر سۇراپ وتىرعاندىعىن ايتادى. ال اباي ەسكەرتكىشى جانىنداعى شاراعا قالا تۇرعىندارى مەن قوناقتارى جينالىپ، رۋحاني كەشتىڭ كۋاسى بولدى. جينالعاندار ويشىل اقىننىڭ تۋعان كۇنىندە ونىڭ ولەڭدەرى، قارا سوزدەرى مەن اندەرىنەن سۋسىندادى. زيالىلار حاكىم اباي قۇنانباي ۇلىنىڭ 175 جىلدىعى اياسىندا اقىننىڭ شىعارماشىلىعىن زەردەلەۋ، سول ارقىلى وسكەلەڭ ۇرپاق بويىنا ەلجاندىلىق پەن وتانسۇيگىشتىكتى ءسىڭىرۋ قاجەتتىگىن جەتكىزدى.

مەكەمتاس مىرزاحمەت ۇلى، ابايتانۋشى:

 - ءبىز ەۋروپالىق دەڭگەيدەگى «اباي تانۋ» ينستيتۋتىن اشۋىمىز كەرەك. ەۋروپا اقىندارىنىڭ بىرەۋى دە اباي جاساعان فيلوسوفيانى، ليريكانى جازعان جوق. اباي مەن شاكارىمنەن اسا المادى.

نەسىپبەك ايت ۇلى، اقىن:

 - اباي وسى بۇگىنگى كۇندى، تاۋەلسىزدىكتى اڭساپ كەتكەن ادام. اباي نۇسقاپ كەتكەن پاراساتتىڭ جولىنان، اباي نۇسقاپ كەتكەن ەل بيلەۋدىڭ جولىنان ءبىز اداساتىن بولساق، بولاشاعىمىزدان اداسامىز. اباي شىراعى ەلباسىنان باستاپ، جەتىدەگى بالا مەن جەتپىستەگى قارتتىڭ الدىندا جاتاتىن باعدارشامى بولۋ كەرەك. ول - ويدىڭ ەلدىكتىڭ، ەلگە دەگەن ەلدىكتىڭ باعدارشامى.

www.24.kz