قازاقستاندىق ازامات مەككەدە بولعان تاڭعاجايىپ وقيعالارىمەن ءبولىستى
ەر ادام قاسيەتتى مەكەنگە بارعان سايىن، ونىڭ ءار تىلەگى ورىندالعان كورىنەدى. بۇل تۋرالى Sputnik قازاقستان حابارلايدى.
اقتوبەلىك ازامات وسىمەن ءۇشىنشى رەت مەككەگە اتتانعانىنا الدىمەن اللاعا شۇكىرشىلىك ەتەتىنىن ايتقان.
«مەنى وزىنە قوناق قىلىپ شاقىرىپ وتىرعان اللاعا مىڭ دا ءبىر العىس ايتامىن. قاجىلىقتان كەيىن سانامدا كوپتەگەن وزگەرىستەر بولدى. باسقاشا ايتقاندا مەن رۋحاني تۇرعىدا باي ادامعا اينالدىم»، - دەيدى ەر ادام.
سونىمەن بىرگە ەر ادام العاش رەت قاعبا مەن ارافات تاۋىن كورگەندەگى اسەرىمەن دە بولىسكەن. ونىڭ ايتۋىنشا، مەككەدە ەر-ازاماتتىڭ بارلىق نيەت ەتكەن تىلەگى ورىندالىپ، ول ءبىرشاما تاڭعاجايىپ وقيعالاردىڭ كۋاسى بولعان.
«مەنىڭ مەككەگە ءۇش ساپارىم دا ءبىر-بىرىنە ۇقسامادى. مۇنداي كۇيدى اتا-اناڭدى كوپ ۋاقىت كورمەگەن ۋاقىتتا باستان كەشەسىڭ. ولاردى ساعىناسىڭ. مەندە دە ءدال سولاي بولدى. اللامەن ساعىنا قاۋىشىپ، وعان ىشتەگى بار سىرىڭدى، نيەت-تىلەگىڭدى اقتارعانداي كۇي كەشتىم.
ءبىر قىزىعى مەن نيەت ەتكەن تىلەكتىڭ كوپشىلىگى ورىندالدى. ماسەلەن مەن بۇرىن كەزدەسىپ كورمەگەن رۋحاني ۇستازىممەن كەزدەسكىم كەلدى.
ويلاعانىم سول ەدى، ول جانىمنان تابىلا قالدى. سۋ ىشكىم كەلدى، ءبىر ۋاقىتتا بىرەۋ ماعان اياق استىنان سۋ اكەلىپ بەردى. سوسىن شايتانعا تاس لاقتىرۋ راسىمىندە ادام وتە كوپ بولدى.
مەن ىشىمنەن ول جاققا جاقىنداي المايتىن شىعارمىن دەپ ويلاپ تۇرعانمىن، وقتا-تەكتە وزىنەن-ءوزى جول پايدا بولىپ، ادامداردىڭ قاراسى سەيىلە باستادى. وسىلايشا مەن كوپتىڭ ىشىنە كىرىپ كەتتىم»، - دەپ اعىنان جارىلدى ەر ادام.
اسقار رامازانوۆ ەكى جىل بۇرىن مەككەدە جوعالتىپ العان ءۇش مىڭ دوللارى بار ءامياننىڭ دا عاجايىپتىڭ كۇشىمەن تابىلعانىن اتاپ ءوتتى.
«مەن تاۋبەمە كەلىپ، ىشىمنەن باستىسى قايتارعا بيلەتىم بار دەپ سابىرعا كەلىپ وتىرعانمىن. بىرەۋ الىستان «اسقار» دەپ ايعاي سالدى. سويتسەم جەرگىلىكتى پوليتسەيلەر مەنىڭ اميانىمدى تاۋىپ العان ەكەن.
ال ولاردىڭ جانىنان سول مەزەتتە ءبىر قازاقستاندىق ازامات ءوتىپ بارا جاتىپتى. ول مەنىڭ جۇرگىزۋشى كۋالىگىمدى كورىپ، بىردەن اتىمدى اتاپ، ايعاي سالىپتى. وسىلايشا اميانىم مەن اقشامدى تاۋىپ الدىم»، - دەيدى ەر ازامات.
ايتا كەتەيىك، بيىل 3 مىڭنان استام قازاقستاندىق ازامات قاسيەتتى جەرگە بارىپ، اللا الدىنداعى بەس پارىزىنىڭ ءبىرىن ورىندادى. ولاردىڭ ءبىرقاتارى ەلگە ورالدى.