بوس جاتقان جەرلەر مەملەكەت مەنشىگىنە قايتارىلۋدا

پەتروپاۆل. قازاقپارات -  سولتۇستىك قازاقستان وبلىسىندا جەردى الىپ، الايدا يگەرمەي وتىرعان شارۋاشىلىقتاردان القاپتار مەملەكەت يەلىگىنە قايتارىلىپ جاتىر، دەپ حابارلايدى قازاقپارات ءتىلشىسى.

س ق و جەر ينسپەكتسياسى باسقارماسى ماماندارىنىڭ مالىمەتىنشە، سوڭعى بەس جىلدىڭ ىشىندە جالپى اۋماعى 2,9 ميلليون گەكتارعا 1887 تەكسەرۋ جۇرگىزىلدى. ناتيجەسىندە 1,7 ميلليون گەكتار جەر زاڭناماسىن بۇزۋدىڭ 985 دەرەگى انىقتالدى.

«وسى جەرلەرمەن جۇمىس جۇرگىزۋ ناتيجەسىندە 529 مىڭ گەكتار جەردە بۇزۋشىلىقتار جويىلدى. ياعني ەگىستىكتەرگە ەگىن ەگىلىپ، جايىلىمدارعا مالدار جايىلا باستادى. تەكسەرۋ ناتيجەلەرى بويىنشا جالداۋ شارتتارىن بۇزۋ جولىمەن 658,3 مىڭ گەكتار جەر مەملەكەت مەنشىگىنە قايتارىلدى. بۇل - 74 شارۋاشىلىقتىڭ جەرى.

بيىل 316 تەكسەرۋ جۇرگىزىلىپ، جارتىسىنا جۋىعىندا بۇزۋشىلىقتار انىقتالدى. 5392 گەكتار اۋىل شارۋاشىلىق جەرى كەلىسىم شارتتاردى بۇزۋ ارقىلى، 10,6 مىڭ گەكتار سوت ارقىلى مەملەكەت مەنشىگىنە قايتارىلدى. قازىرگى ۋاقىتتا 3 شارۋاشىلىقتىڭ 20 مىڭ گەكتاردان استام يگەرىلمەگەن القاپتارىن قايتارۋ سوتتا قارالىپ جاتىر. جىل سوڭىنا دەيىن وسىنداي 15 شارۋاشىلىقپەن جۇمىس ىستەيمىز»، - دەيدى س ق و جەر ينسپەكتسياسى باسقارماسىنىڭ باسشىسى بەيبىتبەك جايلىبايەۆ.

ماقساتسىز پايدالانىلعان جانە يگەرىلمەي بوس جاتقان جەرلەردى مەملەكەتتىك قورعا قايتارۋ جۇمىستارى پەتروپاۆل قالاسىندا دا جۇرگىزىلىپ جاتىر. جەر ينسپەكتسياسىمەن بيىل وبلىس ورتالىعىندا جالپى اۋماعى 2,5 گەكتار 10 ۋچاسكە الىندى. تاعى 20 جەر پايدالانۋشى ءوز ەركىمەن ۋچاسكەلەرىن قايتاردى.

«مىسالعا الاتىن بولساق پەتروپاۆل ماڭىنداعى 20 گەكتار جەر ماجبۇرلەپ الىندى. «شىعىس ەليون» ج ش س جەر ۋچاسكەسىن 20 جىلدان ارتىق يگەرمەگەن. بۇل ورىنعا ەندى كوپبەيىندى ۇلكەن اۋرۋحانا سالىنادى. وبلىس ورتالىعىندا كوپتەگەن جەر بوس، پايدالىنىلماي جاتىر. كاسىپكەرلەر ول ۋچاسكەلەردى ءبىر-بىرىنە ساتىپ كەلگەن. ماقساتتى پايدالانىلماعاندىقتان بۇل جەرلەر قايتارىلادى، ساۋلەتتى عيمارات تۇرعىزىپ، جۇمىس ورىندارىن اشاتىن كاسىپكەرلەرگە بەرىلەدى»، - دەيدى بەيبىتبەك جايلىبايەۆ.

باسقارما ماماندارىنىڭ مالىمەتىنشە، سوڭعى 5 جىل ىشىندە جەر زاڭناماسى نورماسىن بۇزۋشىلارعا 1024 نۇسقاما بەرىلىپ، جالپى سوماسى 64 ميلليون تەڭگەگە 621 اكىمشىلىك جازا قولدانىلدى. جەردى يگەرمەگەندەرگە سالىق 10 ەسە ۇلعايتىلادى. بۇگىنگى كۇنگە 442,1 ميلليون تەڭگە شاماسىندا سالىق سالىنسا، ونىڭ 38,5 ميلليون وسى جىلعا تيەسىلى.