نۇرلان نىعماتۋلين: قازاقستان- قىتاي ىنتىماقتاستىعى ستراتەگيالىق سەرىكتەستىك دەڭگەيىنە جەتتى

نۇر- سۇلتان. قازاقپارات - بۇگىن ءماجىلىس ءتوراعاسى نۇرلان نىعماتۋلين قىتاي حالىق رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى جاڭ شياۋدى قابىلدادى. بۇل تۋرالى قازاقپارات ءماجىلىستىڭ ءباسپاسوز قىزمەتىنە سىلتەمە جاساپ حابارلايدى.

تاراپتار قازاقستان مەن قىتاي اراسىنداعى ىنتىماقتاستىقتى پارلامەنتارالىق دەڭگەيدە نىعايتۋ ماسەلەلەرىن تالقىلادى.

نۇرلان نىعماتۋلين اتاپ وتكەندەي، قازاقستان مەن قىتاي باسشىلارىنىڭ ارقاسىندا ەكىجاقتى ىنتىماقتاستىق ستراتەگيالىق سەرىكتەستىك دەڭگەيىنە جەتتى.

قازاقستان مەن قىتاي پارلامەنتشىلەرىنىڭ اراسىنداعى قارىم- قاتىناس ەكى ەلگە ورتاق مۇددەلەر شەڭبەرىندە دامۋدا. ءماجىلىس ءتوراعاسى ارىپتەستەرىنىڭ يننوۆاتسيالىق دامۋ، سونداي- اق ەكونوميكالىق قايتا قۇرۋ رەفورمالارىن زاڭنامالىق قولداۋ تاجىريبەسى قىزىعۋشىلىق تۋدىرىپ وتىرعانىن جەتكىزدى.

نۇرلان نىعماتۋلين «Nur Otan» پارتياسى فراكسياسىنىڭ جەتەكشىسى رەتىندە ءماجىلىس دەپۋتاتتارى- فراكتسيا مۇشەلەرىنىڭ قىتايلىق ارىپتەستەرىمەن بايلانىستى كەڭەيتۋ ماڭىزدىلىعىن اتاپ ءوتتى.

ءماجىلىس ءتوراعاسى مەن جاڭ شياۋ 2019 -جىلى 23-24 - قىركۇيەكتە ەلوردامىز نۇر- سۇلتان قالاسىندا «ۇلكەن ەۋرازيا: ديالوگ. سەنىم. سەرىكتەستىك» تاقىرىبىندا وتەتىن ەۋرازيا ەلدەرى پارلامەنتتەرى سپيكەرلەرىنىڭ ءتورتىنشى كەڭەسىنە جالپىقىتايلىق حالىق وكىلدەرى دەلەگاتسياسىنىڭ قاتىسۋ ماسەلەلەرىن تالقىلادى.

 سونداي- اق، وسى ۋاقىتتا قىتاي حالىق رەسپۋبليكاسى بۇكىل قىتايلىق حالىق وكىلدەرى جينالىسى تۇراقتى كوميتەتىنىڭ ءتوراعاسى لي جاڭشۋدىڭ قازاقستانعا رەسمي ساپارى جوسپارلانعان.