شەتەلدىكتەر ءۇشىن قازاقستاندىق بالانىڭ قۇنى قانشا - ارۋجان سايننىڭ ساۋالى
اۋرجان ساين الەۋمەتتىك جەلىدە قازاقستاندىق بۇلدىرشىندەردىڭ شەتەلدىك ازاماتتارعا 200000 دوللارعا ساتىلىپ جاتقانى تۋرالى حابار تاراعانىن ايتادى. ونىڭ سوزىنە قاراعاندا، جەلى قولدانۋشىلارى بۇل ىسكە ارۋجان سايننىڭ دا قاتىسى بار دەگەن اقپارات تاراتقان.
«الەۋمەتتىك جەلىدە جاريالانعان اقپاراتقا قاتىستى ايتسام، ارۋجان سايننىڭ شەتەلدىكتەردىڭ بالا اسىراپ الۋىنا ەش قاتىسى جوق. ارۋجان ساين بۇل ىسپەن ەشقاشان اينالىسپاعان»، - دەپ جازدى ۋاكىل.
«بۇگىندە ق ر بالا قۇقىقتارىن قورعاۋ كوميتەتى حالىقارالىق بالا اسىراپ الۋ ىسىنە كاسىپتەنگەن 13 اگەنتتىكتى اككرەديتتەگەن. 2015 -جىلدان بەرى بۇگىنگە دەيىن 156 ءبۇلدىرشىن شەتەل اسقان. ولاردىڭ جاسى 1 جانە 9 ارالىعىندا. شەتەلدىكتەردىڭ اسىراپ الۋىنا رەسپۋبليكالىق بالالار بانكىنىڭ ورتالىقتاندىرىلعان ەسەبىندە تۇرعان ەرەكشە مۇقتاجدىعى بار، ءبىر جاستان اسقان بالالار عانا بەرىلەدى»، - دەيدى ارۋجان ساين.
زاڭ بويىنشا شەتەلدىك بالا اسىراپ الۋشىلاردان قازاقستان ەشقانداي اقى تالاپ ەتپەيدى. تەك سوتقا باج تولەمى رەتىندە الىم قاراستىرىلعان.
«اشىق كوزدەردەن، اككرەديتتەلگەن ۇيىمداردىڭ سايتتارىنان بالا اسىراپ الۋدىڭ بارلىق الگوريتمدەرىن وقۋعا بولادى. ءتىپتى قازاقستاننان بالا اسىراپ الۋ قۇنى قانشا ەكەنى دە جازىلعان. بۇل قىزمەتتىڭ قۇنى 15800-38500 ەۋرو ارالىعىندا. بۇل وزگە مەملەكەتتەرگە قاراعاندا الدەقايدا تومەن! شەتەلدىك جۇپتارعا مەكەمە ديرەكتورلارىنا «سارى التىننان جاسالعان بۇيىمدار» مەن وپا- دالاپ، ءاتىر، سپيرتتىك ىشىمدىكتەر سىيعا تارتۋ كەرەكتىگى تۋرالى اقىل- كەڭەستەر بەرىلگەن. نۇسقاۋلىقتاردىڭ كەيبىرىندە بالانىڭ قازاقستاندىق دياگنوزى كوپ جاعدايدا ەۋروپالىق نەمەسە امەريكالىق دياگنوزبەن سايكەسپەي جاتاتىنىن ەسكەرتەدى»، - دەگەن ۋاكىل اتالمىش اقپاراتتاردى تاراتۋشى كوزدەردىڭ سىلتەمەسىن دە كەلتىرگەن.
بالا قۇقىقتارى جونىندەگى ۋاكىل اتالمىش ماسەلەلەر بويىنشا ق ر پرەزيدەنتىنە، ق ر باس پروكۋراتۋراسى مەن ق ر ءبىلىم جانە عىلىم مينيسترلىگىنە حات جولداپتى. ارۋجان ساين شەتەلدىك ازاماتتاردىڭ قازاقستاندىق سابيلەردى اسىراپ الۋىن قولدايتىنىن ايتادى.
ونىڭ پىكىرىنشە، ءار بالانىڭ قازاقستان ازاماتىنىڭ نەمەسە شەتەلدىكتىڭ قامقورلىعىنا الىنىپ، وتباسى جاعدايىندا تاربيەلەنۋىنە قۇقىعى بار. بۇل ءبىر جاعىنان قازاقستاننىڭ حالىقارالىق كونۆەنسيالاردى ورىنداۋىمەن تىكەلەي بايلانىستى.
«الايدا بۇل پروتسەسس باستان- اياق اشىق ءجۇرىپ، 100 پايىز زاڭدى ءارى تۇسىنىكتى بولۋى ءتيىس. سونداي- اق، قازاقستاندىق جانە شەتەلدىك اسىراپ الۋشىنىڭ قۇقىقتارى زاڭنامالىق نەگىزدە تەڭ بولۋى شارت. ق ر «نەكە جانە وتباسى» كودەكسىنىڭ 115-بابىنا سايكەس، جەكە جانە زاڭدى تۇلعالاردىڭ جەتىم بالالار مەن ەرەكشە مۇقتاجدىعى بار سابيلەردى تاڭداۋعا، ورنالاستىرۋعا، بىرەۋگە بەرۋگە باعىتتالعان دەلدالدىق جانە وزگە دە قىزمەتتەرىنە تىيىم سالىنعان. ياعني، جەكە جانە زاڭدى تۇلعالار مۇنداي قىزمەت بارىسىندا ەشقانداي كوممەرتسيالىق مۇددەگە جۇمىس ىستەمەۋى ءتيىس»، - دەپ جازدى ول ءوز پاراقشاسىندا.
بالا قۇقىقتارىن قورعاۋشى ۋاكىل وسىنىڭ ءبارىن تىزە كەلىپ، ق ر بالا قۇقىقتارىن قورعاۋ كوميتەتىنىڭ ءتورايىمى مانشۇك ابىدكارىمنەن بىرەنەشە ساۋال بويىنشا تۇسىنىكتەمە بەرۋدى سۇراعان.
1. كوميتەت اككرەديتتەگەن شەتەلدىك اگەنتتىكتەردىڭ دەلدالدىق قىزمەتىنىڭ قۇنىندا 15800- 38500 ەۋرو ارالىعىنداعى ايىرماشىلىق قايدان كەلگەن؟
2. بالا اسىراپ الۋشىلارعا بالالار مەكەمەلەرىنىڭ ديرەكتورلارىنا التىن اشەكەيلەر تۇرىندە «سىيلىق تارتۋ كەرەكتىگى» تۋرالى ايتىلعان اقىل- كەڭەستەرگە قاتىستى تۇسىنىكتەمە بەرۋ.
3. «بالا اسىراپ الۋ تۋرالى شەشىمگە شاعىمدانۋ كەزەڭىنىڭ سوڭىندا بالالار ۇيىنە تولەنەتىن قايىرمالدىقتار» (3000 ەۋرو) تۋرالى اقپاراتقا، اتالمىش مەكەمەلەردىڭ وسى قاراجاتتى الۋى، قۇجاتتاۋى جانە پايدالانۋى بويىنشا تۇسىنىكتەمە بەرۋ.
4. اسىراۋعا بەرىلگەن بالالاردىڭ دياگنوزدارى تۋرالى قۇجاتتاردى ۇسىنۋ. كەيبىر سايتتاردا بۇل دياگنوزداردىڭ ەمدەلۋ مۇمكىن ەكەنى ايتىلعان. سولاي بولسا، كوميتەت نەگە نازارعا الىپ، قاجەتتى مەديتسينالىق كومەك كورسەتپەگەن؟
5. شەتەلدىكتەردىڭ اسىراپ الۋىنا قانداي مەكەمەلەردەن جانە قانداي وڭىرلەردەن بالا بەرىلدى؟
اۆتور: ەسىمجان ناقتىباي