نۇرسۇلتان نازاربايەۆ كەلەشەگى جوق اۋىلدار تۋرالى ايتتى
«ۇلكەن بيۋدجەت قاراجاتى كەلەشەگى جوق ەلدى مەكەندەردى ۇستاۋعا جۇمسالادى. ءىس جۇزىندە ولار توعىشارلار. بىزدە 7,7 مىڭ ەلدى مەكەننىڭ بار ەكەنىن، ونىڭ 1,8 مىڭىنىڭ كەلەشەگى زور ەكەندىگىن، سولارعا نازار اۋدارۋ قاجەتتىگىن ايتقان بولاتىنبىز. ءبىزدىڭ دالامىز وتە ۇلكەن، كەڭ. انا توبەنىڭ تۇبىندە ءبىر اۋىل بار، ول جەردە 10 ءۇي بار. مىناۋ توبەنىڭ استىندا 50 ءۇيلى ءبىر اۋىل بار. قايسىسىنا ءبىز جول اپارامىز، قايسىنا مەكتەپ، اۋرۋحانا سالامىز؟ ايتىڭىزدارشى، 10 ءۇي ءۇشىن اۋرۋحانا نەمەسە مەكتەپ سالۋىمىز كەرەك پە؟ بۇل ءونىمسىز» ، - دەدى ەلباسى.
وسى رەتتە، قازاقستاننىڭ تۇڭعىش پرەزيدەنتى اۆستراليا مەن كانادانىڭ دا جەر كولەمى ۇلكەن ەكەندىگىن ەسكە سالدى.
«ءبىز ورتالىق بويىنشا داميمىز. بۇل ەشقانداي جاعداي جاسالمايدى دەگەندى بىلدىرمەيدى. كەشە اسقار ۇزاقباي ۇلى (ۇكىمەت باسشىسى - مامين) ءبىز وسى باعىتتا جۇمىس ىستەپ جاتقانىمىزدى باياندادى. ولاردى كەلەشەگى بار وڭىرلەرگە كوشىرۋ قاجەت. ول جەرلەردە مەكتەپ، اۋرۋحانا سالىنىپ، جول تۇسەدى، ينفراقۇرىلىم جاسالادى» ، - دەدى ن. نازاربايەۆ.
ەلباسىنىڭ پايىمىنشا، بۇل مەملەكەتكە ارزانعا تۇسەدى.