نۇرسۇلتان نازاربايەۆ مينيسترلەر مەن اكىمدەردى پروبلەمالاردى جاسىرماۋعا شاقىردى

نۇر- سۇلتان. قازاقپارات - اكىمدەر مەن مينيسترلەر ورىن العان پروبلەمالارعا قاتىستى حالىق الدىنا شىعىپ، جاۋاپ بەرۋدەن قورىقپاۋى كەرەك.

بۇل تۋرالى «Nur Otan» پارتياسى ساياسي كەڭەسىنىڭ كەڭەيتىلگەن وتىرىسىندا ق ر تۇڭعىش پرەزيدەنتى - ەلباسى نۇرسۇلتان نازاربايەۆ ايتتى، دەپ حابارلايدى قازاقپارات ءتىلشىسى.

«مەنىڭشە، ورىن الىپ وتىرعان پروبلەما جايىندا ۇندەمەي قالۋ - جۇمىستىڭ ەڭ ناشار نۇسقاسى. ادامداردان تىعىلماي ءمان- جايدى انىقتاپ، جاۋاپكەرشىلىكتى مويىنعا الۋ كەرەك. بىزدە حالىققا شىعىپ، بۇل سۇراقتارعا جاۋاپ بەرۋدەن قورىقپايتىن، پروبلەمالاردى شەشەتىن اكىمدەر دە، مينيسترلەر دە بار. بەردىبەك ماشبەك ۇلى (ق ر ۇكىمەت باسشىسىنىڭ ورىنباسارى ساپاربايەۆ) ، ۆيتسە- پرەمەر بولىپ تاعايىندالۋىڭمەن قۇتتىقتايمىن. باياعىدان بەرى وسى جەر سەنىڭ ورنىڭ ەدى. ءتورت وبلىستا اكىم بولدىڭ. سونىڭ ءبارىن كوردىڭ. باستاعان كەزدە حالىقتىڭ اراسىندا جۇردىك سول ۋاقىتتا. ەلمەن سويلەسىپ جۇردىك. ايتقانىمىزدى ەل ءتۇسىنىپ ءجۇردى» ، - دەدى ق ر تۇڭعىش پرەزيدەنتى.

ەلباسى شاعىن پروبلەمالاردى جەدەل شەشۋ قاجەتتىگىنە نازار اۋداردى.

«ادامداردى ومىرىندەگى ەڭ كىشكەنتاي ماسەلەلەر تولعاندىرادى. ماسەلەن، سۋ جوق. بۇل اكىم ءۇشىن دەڭگەي ەمەس قوي، ءيا؟ سۋمەن اينالىسۋدىڭ قاجەتى قانشا؟ ال ادامدار ءۇشىن - بۇل ءومىرىنىڭ ءمانى. اۋىلدا جول جوق. بۇل ول ءۇشىن - ءومىرى، ال بىزدەر ءۇشىن - بولماشى نارسە. بىزدەر جاھاندىق ماسەلەلەرگە قۇلاش سەرمەيمىز. سوندىقتان ادامدارعا جاقىن بولۋ كەرەك. پارتيانىڭ قوعامدىق قابىلداۋلارى جۇمىس ىستەۋى ءتيىس» ، - دەدى ن. نازاربايەۆ.