الاتاۋ-تامشىبۇلاق ەسىمدى اعىلشىن جازۋشىسى قازاق جەرى تۋرالى كىتاپ شىعاردى
بۇگىن تالدىقورعاندا تۋىندىنىڭ تۇساۋكەسەرى ءوتتى، دەپ حابارلايدى قازاقپارات ءتىلشىسى.
«كىتاپتىڭ تۇساۋكەسەرى الماتى وبلىسىندا ءوتىپ جاتقانى بەكەر ەمەس. سەبەبى، 19-عاسىردا قازاق جەرىنە ساياحاتتاپ كەلگەن اعىلشىندىق ساياحاتشى توماس پەن ليۋسيدىڭ تۇڭعىش بالالارى ءدال وسى جەتىسۋ جەرىندە دۇنيەگە كەلگەن. ولار قازاق جەرىندە تۋعان ۇلدارىنا الاتاۋ-تامشىبۇلاق دەگەن ەسىم بەردى جانە ساياحاتتارىنىڭ باسىم بولىگى وسى جەتىسۋ جەرىندە ءوتتى»، - دەدى كىتاپ اۆتورى دجون ماسسي ستيۋارت.
قازاق جەرى جايلى جازىلعان كىتاپ اعىلشىن تىلىندە مىڭ دانامەن جارىق كوردى. ال تۋىندى اۆتورى - الاتاۋ-تامشىبۇلاق ءوزى دۇنيەگە كەلگەن تامشىبۇلاققا ارنايى بارىپ، وزگە دە قۇندى دەرەكتەردى ىزدەپ، كىتاپتىڭ جالعاسىن جازۋعا نيەتتى.
«بۇل كىتاپتىڭ قۇندىلىعى اعىلشىن ءتىلدى مەملەكەتتەر، ەلدەر قازاقستاننىڭ تاريحىن، ءداستۇرىن، اسىرەسە، وسى جەتىسۋ ءوڭىرىنىڭ مادەنيەتىن بىلە الادى. سول ارقىلى قازاقستاننىڭ تۋريستىك الەۋەتىن ارتتىرادى دەپ ەسەپتەيمىن»، - دەدى «حابار-24» ارناسىنىڭ لوندونداعى مەنشىكتى ءتىلشىسى عالىمجان قارامان ۇلى.
ەگەر كىتاپ الماتى وبلىسىنىڭ اكىمدىگى تاراپىنان قولداۋ تاپسا قازاقشا جانە ورىس تىلىندە جارىق كورۋى مۇمكىن.
ايتا كەتەيىك، بۇگىنگى كۇندە ءدال وسى اتكينسوننىڭ ۇرپاقتارى تامشىبۇلاققا ۇلى بريتانيادان ارنايى كەلىپ، اتالارىنىڭ كىندىك قانى تامعان جەردىڭ اۋاسىمەن تىنىستاپ، ساياحات جاساۋدى داستۇرگە اينالدىرعان.