ەلباسى: قالاعا كوشتى توقتاتۋ مۇمكىن ەمەس - ءبىراق اۋىلعا دا جاعداي جاساۋ كەرەك

نۇر-سۇلتان. قازاقپارات - اۋىلداردا جۇمىس ورىندارى اشىلىپ، جاعداي جاسالسا - حالىق اۋىلدا قالارى انىق. «اۋىل - ەل بەسىگى» جوباسى جايلى ق ر تۇڭعىش پرەزيدەنتى - ەلباسى نۇرسۇلتان نازاربايەۆ وسىلاي دەدى، دەپ حابارلايدى قازاقپارات ءتىلشىسى.

«وزدەرىڭىز بىلەتىندەي، مەن «اۋىل - ەل بەسىگى» جوباسىن ازىرلەۋدى تاپسىردىم. تاجىريبە جۇزىندە بۇل جوبا الەۋمەتتىك ينفراقۇرىلىم جاساۋمەن عانا شەكتەلدى دە، سونىمەن قالدى... بۇل - ماڭىزدى ماسەلە، ءبىراق جوبانىڭ باستى ماقساتى - اۋىل جاستارى ءۇشىن جۇمىس ورىندارىن اشۋ، ولاردى اۋىلداردا تۇراقتاتۋ. اۋىلدا ەرتەڭ كىم جۇمىس ىستەيدى؟ ۇكىمەت وسى ماسەلەلەرمەن اينالىسىپ، ءتيىستى شارالاردى قولعا الۋ كەرەك. قازىر ۋربانيزاتسيا ءجۇرىپ جاتىر. قالاعا كوشتى توقتاتۋ مۇمكىن ەمەس. ەگەر دە اۋىلداردا ناقتى جۇمىس ورىندارى اشىلاتىن بولسا، جاعداي جاسالسا - قالىپ جاتىر. كەيبىر ادامدار قالادان اۋىلعا قايتا كوشۋدە»، - دەدى ەلباسى «Nur Otan» پارتياسى ساياسي كەڭەسىنىڭ كەڭەيتىلگەن وتىرىسىندا.

ايتا كەتسەك، ەلوردادا ق ر تۇڭعىش پرەزيدەنتى - ەلباسى نۇرسۇلتان نازاربايەۆتىڭ توراعالىعىمەن «Nur Otan» پارتياسى ساياسي كەڭەسىنىڭ كەڭەيتىلگەن وتىرىسى ءوتىپ جاتىر.