شىمكەنتتەگى ۋنيۆەرسيتەتتى تەكسەرۋدەن كەيىن ءۇش ءىس قوزعالدى

نۇر-سۇلتان. قازاقپارات – ق ر ءبىلىم جانە عىلىم مينيسترلىگىنىڭ جوسپاردان تىس تەكسەرۋىنەن كەيىن شىمكەنتتەگى ۋنيۆەرسيتەتتە ءۇش ءىس قوزعالدى، دەپ حابارلايدى قازاقپارات مينيسترلىكتىڭ باسپا ءسوز قىزمەتىنە سىلتەمە جاساپ.

«2019-جىلعى 5-15- تامىز ارالىعىندا ق ر ءبىلىم جانە عىلىم مينيسترلىگى شىمكەنت قالاسىنىڭ ايماقتىق الەۋمەتتىك-يننوۆاتسيالىق ۋنيۆەرسيتەتىندە جوسپاردان تىس تەكسەرۋ جۇرگىزگەن بولاتىن. اتالعان وقۋ ورنىندا جوعارى وقۋ ورىندارىنىڭ قىزمەتىنە قويىلاتىن 78 تالاپتىڭ 63 ءى ساقتالماعاندىعى انىقتالىپ وتىر»، دەلىنگەن حابارلامادا.

تەكسەرۋ بارىسىندا ءبىرقاتار بۇزۋشىلىق انىقتالعان.

«اتاپ ايتساق جوعارى جانە جوعارى وقۋ ورنىنان كەيىنگى ءبىلىم بەرۋدىڭ مەملەكەتتىك ستاندارتىنىڭ تالاپتارى بۇزىلعان؛ جوعارى وقۋ ورىندارى قىزمەتىنىڭ ۇلگىلىك ەرەجەلەرىنىڭ تالاپتارى ساقتالماعان؛ جوعارى وقۋ ورىندارىنىڭ ءبىلىم بەرۋ قىزمەتىن ليتسەنزيالاۋ كەزىندە قويىلاتىن بىلىكتىلىك تالاپتارىنا سايكەسسىزدىك فاكتىلەرى انىقتالعان. سونداي-اق، وقۋعا قابىلداۋ ءتارتىبىن، ءبىلىم الۋشىلاردى اۋىستىرۋ جانە قايتا قابىلداۋ ءتارتىبىن، اكادەميالىق دەمالىس بەرۋ ءتارتىبىن ساقتاماۋ فاكتىلەرى اشكەرەلەنىپ وتىر»، دەلىنگەن حابارلامادا.

ساباققا قاتىسپاعان ءبىرقاتار ستۋدەنتتەردىڭ سىناق-ەمتيحان سەسسياسىنا قاتىسۋ فاكتىلەرى بەلگىلى بولعان.

«بۇل رەتتە، اتالعان ستۋدەنتتەر ۋنيۆەرسيتەتكە اقشا تولەي وتىرىپ، سەسسياعا جىبەرىلگەن. ۆەدوموست قاعازدارىندا ستۋدەنتتىڭ باعاسى كورسەتىلمەگەن، الايدا وقىتۋشىنىڭ قولى قويىلعان بوس باعاندار بار.

ءتىپتى باسقا ايماقتاردا تۇرىپ جاتقان جانە باسقا ۇيىمداردىڭ قىزمەتكەرلەرى بولىپ تابىلاتىن ادامداردىڭ ۋنيۆەرسيتەتتىڭ شتاتتىق قىزمەتكەرلەرى بولىپ قىزمەت ەتىپ ءجۇرۋ فاكتىلەرى انىقتالىپ وتىر»، دەلىنگەن حابارلامادا.

سونىمەن قاتار، ءبىلىم جانە عىلىم مينيسترلىگىنە ۋنيۆەرسيتەت تۇلەكتەرىن جۇمىسقا ورنالاستىرۋ دەڭگەيى تۋرالى جالعان مالىمەتتەر بەرىلىپ وتىرعان. مىسالى، 2018-جىلى جۇمىسقا ورنالاسۋ دەڭگەيى ناقتى 34,4 پايىزدى قۇراعانىمەن، ۋنيۆەرسيتەت تاراپىنان كەلگەن رەسمي ەسەپتەردە 71,3 پايىز بولىپ كورسەتىلگەن.

ءبىلىم بەرۋ سالاسىنداعى زاڭنامانى بۇزۋ فاكتىلەرى بويىنشا مينيسترلىك ۋنيۆەرسيتەتكە قاتىستى 3 اكىمشىلىك قۇقىق بۇزۋشىلىق تۋرالى ءىس قوزعادى: جوعارى وقۋ ورىندارى قىزمەتىنىڭ ۇلگىلىك ەرەجەلەرىن بۇزعانى ءۇشىن، مەملەكەتتىك ءبىلىم بەرۋ ستاندارتىن ساقتاماعانى ءۇشىن جانە ليتسەنزيالىق تالاپتارعا سايكەس كەلمەگەنى ءۇشىن. بۇگىنگى تاڭدا ءبىلىم بەرۋ سالاسىنداعى زاڭنامانى بۇزۋشىلىقتاردى جويۋ تۋرالى ۇيعارىم شىعارىلدى.

ەندىگى كەزەكتە اكىمشىلىك ءوندىرىس ماتەريالدارى وسى جىلدىڭ 23- تامىزىندا قارالاتىن بولادى. ا ق ب ت ك- ءنىڭ وسى باپتارىنىڭ سانكتسيالارى اكىمشىلىك ايىپپۇل سالۋدى، سونداي-اق ليتسەنزيانىڭ قولدانىلۋىن 6 ايعا دەيىنگى مەرزىمگە توقتاتۋدى كوزدەيدى.

مينيسترلىك قابىلدانعان شارالار تۋرالى قوسىمشا حابارلايتىن بولادى.