ەلوردادا ۇلتتىق ۇستەل ويىندارىنىڭ تۇڭعىش فەستيۆالى ءوتىپ جاتىر
قازاق، نەمىس، كورەي، ەۆرەي، پولياك، ارميان، بەلارۋس، سلاۆيان، ۋكراين، دۇنگەن، قىرعىز، كازاك، وزبەك، كۇرد، قاراقالپاق جانە باشقۇرت ۇلتتارىنىڭ 16 ءتۇرلى ۇستەل ويىنى تانىستىرىلاتىن شارا ۇمىت بولىپ بارا جاتقان عۇرىپتاردى جاڭعىرتۋعا باعىتتالىپتى. ەلوردالىق ەتنو-مادەني بىرلەستىكتەردىڭ شەرۋىمەن باستالعان فەستيۆالگە قاتىسۋشىلاردى قازاقستان حالقى اسسامبلەياسى ءتوراعاسىنىڭ ورىنباسارى جانسەيىت تۇيمەبايەۆ قۇتتىقتادى.
«كەز كەلگەن حالىقتىڭ ومىرىندە ۇلتتىق ويىنداردىڭ ماڭىزى زور بولعان. ول حالىقتىڭ ءومىر ءسۇرۋ سالتىنان حابار بەرە وتىرىپ، كۇشتى، قارىمدى، ءادىسقوي بولۋ تاسىلدەرىن ۇيرەتكەن. جاس ۇرپاقتى شىمىر، باتىل، ۇشقىر ويلى، تاپقىر بولۋعا تاربيەلەگەن دە وسى ۇلتتىق ويىندار. مىسالى، قازاقتىڭ بايگە، اۋدارىسپاق، كوكپار، جامبى اتۋ سياقتى سايىستارىنىڭ، جاستارعا ارنالعان قىز قۋار، التىباقان، اقسۇيەك سياقتى ساۋىقتىق شارالاردىڭ، ويلاۋدى دامىتىپ، ەسەپتەۋگە، توزىمدىلىككە ۇيرەتەتىن قيسىنعا قۇرىلعان ويىنداردىڭ بىرنەشە مىڭ جىلدىق تاريحى بار.
ەلىمىزدە ەتنومادەني تاربيەگە مەملەكەتتىك دەڭگەيدە ءمان بەرىلىپ وتىر. ۇستەل ويىندارى - ۇلتتىق ويىنداردىڭ ءبىر تارماعى. ونىڭ كوبى ءراسىم نەمەسە اسكەري سايىس رەتىندە كونەدەن كەلە جاتىر. قازىر كوبىنىڭ ءمانى مەن مازمۇنى وزگەرىپ، زامانعا ساي جەتىلگەن. ءتىپتى كەيبىرى ۇمىت بولىپ بارادى. بۇگىنگى شارا ەلدەگى ەتنوستاردىڭ وسى ۇمىت بولىپ بارا جاتقان ۇلتتىق ويىندارىن ءبىر-بىرىنە ناسيحاتتاۋىنا جول اشادى»، - دەدى جانسەيىت تۇيمەبايەۆ.
فەستۆالگە قاتىسۋشىلار ءوز ۇلتىنىڭ ۇستەل ويىنىن شارا قوناقتارىنا تانىستىرىپ، شەبەرلىك ساعاتتارىن وتكىزدى. نەمىستىڭ «ۋنوسى»، كورەيدىڭ «حاتوسى»، تاتارلاردىڭ «ەكياتى»، ەۆرەيدىڭ «درەندەلى»، قىرعىزدىڭ «توعىز كورگوولى»، باشقۇرتتىڭ «جاستىق ۇرىسى»، وزبەكتى «شاپپاسى»، قاراپالقپاقتى «بەكتاشى» ويىن سۇيەر جاس وسپىرىمدەردىڭ عانا ەمەس، ءتۇرلى ەتنوس وكىلدەرىنىڭ دە نازارىن اۋداردى. فەستيۆال اياسىندا ۇلتتىق ويىن شەبەرى اقتورە قۋاندىقوۆ قازاقتىڭ اسىق ويىندارىن پاش ەتىپ، ەل ىقىلاسىنا بولەندى.
فەستيۆال قورىتىندىسىندا شاراعا بەلسەندى اتسالىسقان ەتنومادەني بىرلەستىك وكىلدەرىن ماراپاتتاۋ جوسپارلانعان.