مارالدىداعى اتىس: مينيستر تۇرعىمبايەۆ وقيعانىڭ قالاي بولعانىن ايتىپ بەردى

نۇر-سۇلتان. قازاقپارات - ىشكى ىستەر ءمينيسترى ەرلان تۇرعىمبايەۆ پاۆلودار وبلىسىنىڭ مارالدى اۋىلىنداعى اتىستىڭ ءمان-جايىن ءتۇسىندىرىپ بەردى، دەپ حابارلايدى قازاقپارات ءتىلشىسى.

«ول جاقتاعى كول ينۆەستورعا جالعا بەرىلگەن. ينۆەستور اتالعان كولدىڭ تابيعي بايلىعىن باعىپ، بالىعىن اۋلاۋمەن اينالىسادى. ماسەلە - سانكتسيالانباعان بالىق اۋلاۋ جاعدايلارى مەن ارنايى شايانداردىڭ اۋلانۋىندا. ءبىراق، بۇل شايانداردىڭ اۋلانۋى بويىنشا ارنايى كۆوتا بار. كۆوتادان اسىرىپ، شاياندى اۋلاۋعا بولمايدى. سول سەبەپتى، بۇل شايانداردى اۋلاۋ بويىنشا براكونەرلىك ارەكەت بولماۋ ءۇشىن كۆوتا بەلگىلەنگەن. ءبىراق، جەرگىلىكتى تۇرعىندار شاياندى كۆوتاسىز اۋلاعاندىقتان، اتالعان كاسىپكەر ارنايى كۇزەت قىزمەتىن جالداعان. مۇنىڭ ءبارى اينالىپ كەلىپ، جەرگىلىكتى تۇرعىندار مەن كۇزەت قىزمەتكەرلەرى اراسىندا توبەلەسپەن اياقتالىپ، ب ا ق- تا كورگەنىڭىزدەي جانجال بولىپ، تراۆماتيكالىق قارۋ قولدانىلعان»، - دەدى ەرلان تۇرعىمبايەۆ ۇكىمەت وتىرىسىنان كەيىن تىلشىلەردىڭ سۇراعىنا جاۋاپ بەرە وتىرىپ.

ءمينيستردىڭ ايتۋىنشا، وسى جانجالدىڭ سالدارىنان بەس ادام اۋرۋحاناعا تۇسكەن.

«ءبىر جاقسىسى، ەشكىم اۋىر جاراقات الماپتى. قازىرگى تاڭدا ول جەردە پوليتسيانىڭ كۇشەيتىلگەن ناريادى جۇمىس ىستەۋدە. كەشە سونداي-اق، كۇزەت قىزمەتكەرلەرىنىڭ ۇرلانعان كولىگى دە تابىلدى. ەكى قىلمىستىق ءىس قوزعالدى. جاعداي باقىلاۋدا. جەدەل تەرگەۋ امالدارى باستالىپ، وقيعا ورنىنا وبلىستىق پوليتسيا دەپارتامەنتىنىڭ باستىعى شىقتى. تولىققاندى اقپاراتتى تۇستەن كەيىن ول ب ا ق- قا بەرەدى»، - دەدى ول.

ىشكى ىستەر ءمينيسترىنىڭ ايتۋىنا قاراعاندا، وبلىس اۋماعىنداعى كولشىكتەردىڭ بارلىعى بويىنشا كۆوتانى جەرگىلىكتى اتقارۋشى ورگان بەرەدى.

«جانجال نە ءۇشىن تىركەلدى؟ ءبارىن انىقتايمىز»، - دەدى ءسوز سوڭىندا مينيستر.

ايتا كەتسەك، بۇعان دەيىن پاۆلودار وبلىستىق پوليتسيا دەپارتامەنتى 18- تامىزدا جەرگىلىكتى تۇرعىندار مەن كۇزەت اگەنتتىگىنىڭ قىزمەتكەرلەرى اراسىندا اتىس بولعانىن حابارلاعان بولاتىن. ءاۋ باستا كۇزەت قىزمەتكەرلەرى موتوتسيكل ارقىلى ەكى قاپ ارتەميا سالينا شاياندارىن اكەتىپ بارا جاتقان مارالدى اۋىلىنىڭ 32 جاستاعى تۇرعىنىن ۇستاپ العان. وسىدان كەيىن وقيعا ورنىنا جەرگىلىكتى تۇرعىندار كەلىپ، تاراپتار اراسىندا اتىس باستالادى.

وبلىستىق دەپارتامەنتتەن حابارلاعانداي، تۇرعىنداردىڭ ءبىرى كۇزەت اگەنتتىگىنىڭ اۆتوكولىگىن ايداپ كەتكەن. كولىك كەيىن تابىلعانى حابارلانىپ وتىر. توبەلەس كەزىندە پوليتسيا قىزمەتكەرلەرى اسپانعا تراۆماتيكالىق قارۋمەن وق اتقاننان كەيىن جينالعاندار تاراپ كەتكەن. سول كۇنى تۇندە پاۆلودار قالالىق اۋرۋحاناعا 5 ادام تۇسكەن.