قازاقستان ەلشىسى گەرمانيا پرەزيدەنتىنە سەنىم گراموتاسىن تابىستادى
بۇل تۋرالى ق ر سىرتقى ىستەر مينيسترلىگىنەن ءمالىم ەتتى، دەپ حابارلايدى قازاقپارات.
سالتاناتتى راسىمنەن كەيىن بولعان سۇحبات بارىسىندا ەلشى د. كارىپوۆ ف. -ۆ. شتاينمايەرگە قازاقستاننىڭ پرەزيدەنتى قاسىم-جومارت توقايەۆتىڭ سالەمىن جولدادى، سونداي-اق قازاقستان-گەرمانيا ساياسي، ەكونوميكالىق جانە مادەني-گۋمانيتارلىق قارىم-قاتىناسى ستراتەگيالىق سەرىكتەستىگىنىڭ جوعارى دەڭگەيىن اتاپ ايتتى.
قازاقستاندىق ديپلومات گەرمانيا پرەزيدەنتىنە قازاقستانداعى ەكونوميكانى جاڭعىرتۋ، الەۋمەتتىك سالانى دامىتۋ جانە دەموكراتيالاندىرۋ جونىندەگى ق ر تۇڭعىش پرەزيدەنتى - ەلباسى نۇرسۇلتان نازاربايەۆتىڭ جانە مەملەكەت باسشىسىنىڭ باستاماسىمەن جۇزەگە اسىرىلىپ جاتقان شارالار تۋرالى حاباردار ەتتى. د. كارىپوۆ ەكىجاقتى بايلانىستاردىڭ بارلىق كەشەنى بويىنشا مەملەكەتارالىق قارىم-قاتىناستى نىعايتۋ جانە ءوزارا مۇددەلەرگە جاۋاپتى مىندەتتەردى جۇزەگە اسىرۋعا قاتىستى كۇش-جىگەردى ارتتىرۋ جونىندەگى ەكى ەل اراسىنداعى ىنتىماقتاستىق تەتىكتەرىن جەتىلدىرۋدىڭ ماڭىزدىلىعىن اتاپ ءوتتى.
نەمىس پرەزيدەنتى قازاقستاننىڭ تۇراقتى دامۋىنا جوعارى باعا بەرىپ، مەملەكەت باسشىسى ق. توقايەۆتىڭ ەلدەگى جاڭا ساياسي باستامالارىنا تابىس تىلەدى.
بۇل تۇرعىدا گەرمانيانىڭ فەدەرالدى پرەزيدەنتى 2017-جىلى نۇر-سۇلتان قالاسىنا جاساعان ساپارى اياسىندا وتكەن قازاقستان-گەرمان ىسكەرلىك كەڭەسى بارىسىندا ەكى ەلدىڭ بيزنەس قۇرىلىمدارى اراسىندا 20 عا جۋىق كەلىسىمگە قول قويىلعانىن ەسكە الدى. ول ق ر پرەزيدەنتى ق. توقايەۆتىڭ گەرمانياعا جاسايتىن العاشقى ەۋروپالىق ساپارىن بيىل وتكىزۋ پەرسپەكتيۆاسىن قولداي وتىرىپ، ەكى ەل ءۇشىن مەملەكەتتىك باسىم سالالاردا قازاقستانمەن جان-جاقتى ىنتىماقتاستىقتى دامىتۋعا دەگەن نەمىس تاراپىنىڭ شىنايى پەيىلىن ءبىلدىردى.
كەزدەسۋ سوڭىندا ف. -ۆ. شتاينمايەر قازاقستان باسشىلىعىنا دوستىق سالەم جولداپ، ەلشى د. كارىپوۆكە ديپلوماتيالىق ميسسياسىن ورىنداۋدا تابىس تىلەدى.