نۇر-سۇلتاندا اۋقىمدى كىتاپ فەستيۆالى وتەدى
فەستيۆالدى «BAURZHAN» جەكە قورى، «ABAYbooks» باسپا ءۇيى نۇر-سۇلتان قالاسى اكىمدىگى «استانا جاستارى» مەملەكەتتىك كوممۋنالدىق مەكەمەسىنىڭ قولداۋىمەن ۇيىمداستىرادى.
«KITAP FEST» كىتاپ فەستيۆالى الماتى قالاسىندا 5 جىل قاتارىنان ۇيىمداستىرىلىپ كەلەدى. وسى ۋاقىت ارالىعىندا فەستيۆال شاعىن كىتاپ الماسۋ داستۇرىنەن قالانىڭ اۋقىمدى مادەني-تانىمدىق ءىس-شاراسىنا اينالىپ، حالىقتىڭ ىقىلاسىنا بولەنىپ ۇلگەردى.
جىل سايىن كىتاپ فەستيۆالى مىڭداعان كىتاپسۇيەر قاۋىمدى، تالانتتى اقىن-جازۋشىلار مەن تابىستى بلوگەرلەردى، قوعام قايراتكەرلەرى مەن بەلسەندىلەرىنىڭ باسىن بىرىكتىرەدى.
5 جىل ىشىندە «KITAP FEST» الاڭىندا اۆتورلار مەن باسپا ۇيلەرىنىڭ قاتىسۋىمەن 130 دان استام كىتاپتىڭ تانىستىرىلىمى ءوتتى، قوناقتارعا 20 مىڭعا جۋىق كىتاپ سىيلاندى، 70 تەن اسا كىتاپ دۇكەنى جارمەڭكەگە قاتىسىپ، 45 بلوگەر وزدەرىنىڭ سۇيىكتى كىتاپتارىمەن ءبولىستى.
تۇڭعىش رەت وتەتىن فەستيۆال نۇر-سۇلتان قالاسىنىڭ كىتاپسۇيەر قاۋىمىن قۋانتپاق.
«KITAP FEST» فەستيۆالى 25- تامىز كۇنى ساعات 10:00-19:00 ارالىعىندا ارباتتا (ەسىل وزەنىنىڭ جاعالاۋى) وتەدى.