تۇركىستان وبلىسىنىڭ مىڭعا جۋىق تۇرعىنى سولتۇستىك وڭىرلەرگە قونىس اۋداردى

تۇركىستان. قازاقپارات - «Nur Otan» پارتياسى تۇركىستان وبلىستىق فيليالى «ەڭبەك» باعدارلاماسى بويىنشا حالىق اراسىندا اقپاراتتاندىرۋ جۇمىستارىن باستادى.

پارتيا وكىلدەرى ەلباسىنىڭ باستاماسىمەن 2015-جىلدان بەرى جۇزەگە اسىپ كەلە جاتقان باعدارلاما اياسىندا حالىقتى تىعىز قونىستانعان وڭتۇستىكتەن سولتۇستىككە كوشىرۋ جۇمىستارىن كەڭىنەن ناسيحاتتاۋ ماقساتىندا جيىن وتكىزدى، دەپ حابارلايدى قازاقپارات ءتىلشىسى.

جيىندى «Nur Otan» پارتياسىنىڭ تۇركىستان وبلىستىق فيليالى ءتوراعاسىنىڭ ءبىرىنشى ورىنباسارى بەيسەن تاجىبايەۆ اشىپ، وسى باعىتتا اتقارىلىپ جاتقان جۇمىستار بارىسىن باياندادى.

«ەلباسى ن. نازاربايەۆتىڭ تاپسىرماسى بويىنشا 2015-جىلدان باستاپ ەلىمىزدىڭ جۇمىس كۇشى از سولتۇستىك وڭىرلەرىنە حالقى تىعىز ورنالاسقان وڭتۇستىك ايماقتاردان حالىقتى ءوز ەركىمەن قونىستاندىرىپ، ولارعا قاجەتتى جاعداي جاساۋ جۇمىستارى باستالعان بولاتىن. وسى ورايدا، «Nur Otan» پارتياسى تۇركىستان وبلىستىق فيليالى ىشكى كوشى-قون پروتسەستەرىن رەتتەۋ جانە ەڭبەك كۇشى مول ايماقتان، ەڭبەك كۇشى جەتىسپەيتىن رەسپۋبليكامىزدىڭ سولتۇستىك وڭىرلەرىنە ءوز ەركىمەن حالىقتى قونىستاندىرۋ جۇمىستارىن ناسيحاتتاۋدى قولعا الدىق»، - دەدى بەيسەن تاجىبايەۆ.

اتالعان باعدارلامانى جۇزەگە اسىرۋ بارىسى وڭىردە 2015-جىلدان بەرى باستالىپ، بۇگىنگى تاڭدا 881 وتباسى نەمەسە 3377 ادام قونىس اۋدارعان. ولار مەملەكەت تاراپىنان بەرىلەتىن ءتۇرلى الەۋمەتتىك كومەكتەرمەن قامتاماسىز ەتىلگەن. حالىقتى قونىس اۋدارۋعا ىنتالاندىرۋ ماقساتىندا سولتۇستىك وڭىرلەردىڭ وكىلدەرى كەزەڭ-كەزەڭىمەن وبلىستا ءتۇسىندىرۋ جۇمىستارىن جۇرگىزۋگە بىرنەشە كەزدەسۋ وتكىزۋدە. سونىمەن قاتار سولتۇستىك، شىعىس وڭىرلەرىندەگى بوس جۇمىس ورىندارى تۋرالى مالىمەت اي سايىن الىنىپ، اۋداندىق، قالالىق جۇمىسپەن قامتۋ ورتالىقتارىنىڭ بازالىق مالىمەتتەرىنە ەنگىزىلىپ وتىر. تەك اعىمداعى جىلدىڭ 1- توقسانىندا 3 مىڭعا جۋىق جۇمىس ورىندارى ۇسىنىلدى.

ايتا كەتەيىك، 2018-جىلعا رەسپۋبليكا بويىنشا بولىنگەن 1706 كۆوتا نەگىزىندە وبلىستان 455 وتباسى، 1768 ادام سولتۇستىك وڭىرلەرگە قونىس اۋدارعان. ولار كۆوتامەن، كوشۋ ءۇشىن بەرىلەتىن سۋبسيديامەن قامتاماسىز ەتىلۋدە.

تۇراقتى مەكەنجايلارىن اۋىستىرعانداردىڭ باسىم بولىگى سارىاعاش (91 وتباسى)، سايرام (63 وتباسى) ، ماقتارال (75 وتباسى)، ورداباسى (49 وتباسى) اۋداندارىنىڭ تۇرعىندارى. ال، بيىلعى جىلى وبلىستان 427 وتباسى، 1608 ادام كوشىرۋ جوسپارلانىپ وتىر.

قازىرگى تاڭدا 284 وتباسى نەمەسە 911 ادام سولتۇستىك وڭىرلەرگە قونىس اۋداردى. ولار قوستاناي، شىعىس قازاقستان، سولتۇستىك قازاقستان جانە پاۆلودار وبلىستارىنا قونىس اۋداردى.

ەسكە سالايىق، «ەڭبەك» باعدارلاماسىنا قاتىسۋشىعا جانە ونىڭ وتباسى مۇشەلەرىنە - وتاعاسىنا جانە ءاربىر وتباسى مۇشەسىنە ءبىر رەت 35 ا ە ك (88375 تەنگە) مولشەرىندە كوشۋگە ماتەريالدىق كومەك بەرىلەدى. بۇگىنگى تاڭعا دەيىن تۇركىستان وبلىسىنان قونىس اۋدارعانداردىڭ باسىم بولىگى تۇرعىن ۇيمەن، جۇمىسقا قابىلەتتى وتباسى مۇشەلەرى جۇمىسپەن قامتىلعان. ءوز كاسىبىن اشامىن دەۋشىلەرگە ەگىن ، مال شارۋاشىلىعىمەن شۇعىلدانۋعا جەر تەلىمدەرى بەرىلۋدە. بوس تۇرعان عيماراتتار ۇسىنىلىپ، سوندا قونىستانىپ جاتىر. بارعان ازاماتتار سونداي-اق، كوشىپ-قونۋعا بايلانىستى مەملەكەت تاراپىنان بەرىلەتىن ماتەريالدىق كومەكتەرمەن قامتاماسىز ەتىلۋدە.