21:21, 19 - تامىز 2019 | GMT +6
بايقوڭىردان روبوت باسقاراتىن «سويۋز مس» كەمەسى ۇشىرىلادى
بايقوڭىر. قازاقپارات - بۇگىن «سويۋز مس-14» عارىش كەمەسى ورناتىلعان «سويۋز-2.1ا» زىمىران تاسىعىشى مونتاجداۋ- سىناق كورپۋسىنان شىعارىلىپ، بايقوڭىر عارىش ايلاعىنىڭ № 31 الاڭىنداعى ستارت كەشەنىنە ورناتىلدى، دەپ حابارلايدى «قازاقپارات» ح ا ا ءتىلشىسى.
«روسكوسموس» باسپا ءسوز قىزمەتىنىڭ مالىمەتىنشە، ماماندار ۇشۋ الدىنداعى تەحنولوگيالىق وپەراتسيالارعا كىرىستى.
«سويۋز مس» باسقارىلاتىن عارىش كەمەسى پيلوتسىز ۇشاتىن العاشقى كەمە بولماق. عارىشكەردىڭ ورنىنا Skybot F-850 اتتى ادام كەيپىندەگى روبوت وتىرعىزىلعان. ول «اندرويدنايا تەحنيكا» كومپانياسىنىڭ پەرسپەكتيۆالى زەرتتەۋلەر قورىمەن بىرلەسىپ شىعارعان ءونىمى.
جوسپار بويىنشا، «سويۋز مس-14» عارىش كەمەسى بار «سويۋز-2.1ا» زىمىران تاسىعىشى 22 - تامىز كۇنى نۇر- سۇلتان قالاسىنىڭ ۋاقىتىمەن 09:38 دە ۇشىرىلۋى ءتيىس.
«سويۋز مس-14» حالىقارالىق عارىش ستانتسياسىنا عارىشكەرلەردىڭ كەرەك- جاراعىن، عىلىمي زەرتتەۋلەرگە قاجەتتى قوندىرعىنى، مەديتسينالىق قۇرالدار، ازىق- تۇلىك، ەكيپاجعا جىبەرىلگەن زاتتاردى جانە تاعى باسقالارىن جەتكىزەدى.