اقمولا وبلىسىنداعى كارانتين: ەلوردالىقتارعا ەش قاۋىپ جوق

نۇر- سۇلتان. قازاقپارات - اقمولا وبلىسىنا قاراستى ولگينكا اۋىلىنان شىققان ءسىبىر جاراسىنان ەلوردالىقتارعا ەش قاۋىپ ءتونىپ تۇرعان جوق.

بۇل تۋرالى ق ر دسم تاۋارلار مەن قىزمەتتەردىڭ ساپاسىن جانە قاۋىپسىزدىگىن باقىلاۋ كوميتەتى اسا قاۋىپتى ينسپەكتسيالار مەن بيوقاۋىپسىزدىكتى ەپيدەميولوگيالىق قاداعالاۋ باسقارماسىنىڭ باسشىسى زاۋرەش ءجۇمادىلوۆا ايتتى، دەپ حابارلايدى قازاقپارات ءتىلشىسى.

«تۇينەمە ادامنان ادامعا جۇقپايدى. سوندىقتان ناۋقاس ادامنىڭ نۇر- سۇلتان قالاسىنا كەلىپ، جەرگىلىكتى تۇرعىنداردىڭ بارلىعىنا جۇقتىرۋ قاۋپى جوق. مۇنداي دولبار قيسىنسىز. ال ەت باسقا ماسەلە. انىقتالعان ەتتىڭ بارلىعىن تاۋىپ ورتەپ جىبەردىك. زالالدانعان ەتتىڭ ءبارىن جيناپ العان سياقتىمىز. سول سەبەپتى نۇر- سۇلتان قالاسى تۇرعىندارىنا قاۋىپ وتە تومەن» ، - دەدى زاۋرەش ءجۇمادىلوۆا.

ال ق ر اشم ۆەتەرينارلىق باقىلاۋ جانە قاداعالاۋ كوميتەتىنىڭ ءتوراعاسى ارمان وتەعۇلوۆ ەلوردالىقتاردىڭ نەلىكتەن قاۋىپتەنبەۋى كەرەكتىگىن ءتۇسىندىرىپ بەردى.

«قاۋىپتەنۋ ورىندى. ۆەتەريناريانى، جانۋارلاردىڭ جايىلىم ەرەكشەلىكتەرىن بىلمەيتىن ادامداردا تۇينەمە ەلورداعا دا كەلىپ جەتەتىندەي سەزىمنىڭ بايقالۋى مۇمكىن. ەلدى مەكەن ەلوردادان 165 شاقىرىم جەردە. بۇل ەلدى مەكەندە كارانتيندىك شارالار جۇرگىزىلىپ جاتىر. كارانتين بولعان كەزدە ول جەرگە ەشكىم كىرە المايدى. ءبىز كولىكتەر كىرگەندە دە، شىققاندا دا زالالسىزداندىرامىز. ول جاقتان ءونىم سىرتقا شىعارمايدى. ول كارانتين الىنعاننان كەيىن عانا مۇمكىن بولماق. ەش قاۋىپ جوق» ، - دەدى كوميتەت باسشىسى.

بۇعان دەيىن حابارلاعانىمىزداي، اقمولا وبلىسىنىڭ ارشالى اۋدانىنا قاراستى ولگينكا اۋىلىندا « ءسىبىر جاراسىنا» قاتىستى كارانتين جاريالاندى. وبلىستىق دەنساۋلىق ساقتاۋ باسقارماسىنىڭ اقپاراتى بويىنشا، ولگنيكا اۋىلىنىڭ 5 تۇرعىنى اۋرۋحاناعا جاتقىزىلعان. قازىر سىنامالارعا زەرتتەۋ جۇرگىزىلىپ جاتىر. ناۋقاستاردىڭ جاعدايى تۇراقتى. ەلدى مەكەندەگى كارانتين 15 كۇننەن كەيىن الىنادى.