مۇگەدەك ارباسىندا وتىرسا دا كوپكە ۇلگى بولعان كاسىپكەر ايەل

نۇر- سۇلتان. قازاقپارات - اۋىل تۇرعىندارى كاسىپپەن اينالىساتىن بولسا مەملەكەت تاراپىنان كورسەتىلەتىن قولداۋلار مەن جەڭىلدىكتەر بارشىلىق.

وسىنداي قولداۋعا يە بولىپ وتىرعانداردىڭ ءبىرى اتىراۋلىق كاسىپكەر ءاليا يسيموۆا. ول مۇگەدەك ارباسىندا وتىرىپ- اق، حالىققا قىزمەت كورسەتىپ، بالالار ۇيىنە قايىرىمدىلىق جاساپ جۇرگەن ەرەكشە ادام.

گەولوگ ەلدىمەكەنىندە تۇراتىن كاسىپكەر ءاليا يسيموۆانىڭ جاسى 54 تە، ەكى بالانىڭ اناسى، توعىز نەمەرەنىڭ اجەسى. ءوزى I توپتاعى مۇگەدەك بولسا دا، جىگەرى مۇقالماعان. العاشىندا ۇيىندە وتىرىپ 3-4 تىگىن ماشيناسىن ساتىپ الىپ، اۋىل تۇرعىندارىنا قىزمەت كورسەتۋدى باستاپ كەتكەن. تاپسىرىس كوبەيە باستاعان سوڭ ءاليا ۇلكەن شەبەرحانا اشۋدى جوسپارلاپتى. الدىمەن «دامۋ» قورى مەن ەكىنشى دەڭگەيلى بانكتەرگە بارادى. الايدا، ولاردىڭ نەسيە راسىمدەۋ تالابى ۇناماي، اۋىل شارۋاشىلىعىن قارجىلاي قولداۋ قورىنا بارىپ كورەدى.

«اۋىل شارۋاشىلىعىن قارجىلاي قولداۋ قورى ءبىراز جەڭىلدىك قاراستىرادى ەكەن. مۇندا ءتىپتى كاسىبىڭدى تۇراقتى تابىس كوزىنە اينالدىرىپ العانشا 18 ايعا دەيىن جەڭىلدىك مەرزىمى بارىن، كەلەسى جىلى قوسىپ وتەۋگە بولاتىن جەڭىلدىكتەر بار ەكەنىن ءتۇسىندىردى. بيزنەستى قالاي باستايمىن دەپ سەنىمسىزدىكپەن كەلگەن ازاماتتارعا بۇل ۇلكەن قولداۋ. تاعى ءبىر ەرەكشەلىگى كەپىلدىككە الاتىن مۇلىك اۋىلدىق جەردە بولسا دا شەكتەۋ قويىلمايتىندىعى قىزىقتىردى. ءبىز ءۇشىن نەسيەنىڭ 6 پايىزدىق مولشەرلەمەمەن بەرىلەتىنىنىڭ ءوزى ۇلكەن جەڭىلدىك بولدى» ، - دەيدى كاسىپكەر.

وسىلايشا، ءاليا ماماندارمەن كەڭەسىپ، 2016 -جىلى گەولوگ اۋىلىندا تىگىن شەبەرحاناسىن سالۋ ءۇشىن اۋىل شارۋاشىلىعىن قارجىلاي قولداۋ قورىنان 6 پايىزدىق مولشەرلەمەمەن 5 جىلعا 6 ميلليون تەڭگە نەسيە الىپ، قۇرىلىستى باستاپ كەتەدى. قۇرىلىس بىتكەن سوڭ 2017 -جىلى تاعى 3 ميلليون تەڭگە نەسيە راسىمدەگەن. ول قارجىعا شەبەرحانا ىشىنە قۇرال جابدىقتار مەن تىگىن ماشينالارىن ساتىپ الىپ، جۇمىسىن تولىق ىسكە قوسقان. ءسويتىپ، كاسىپكەر جاڭا شەبەرحانادا سۇرانىسقا ساي بارلىق تاپسىرىستاردى قابىلداي باستايدى.

«2018 -جىلى كاسىبىمدى كەڭەيتىپ، زاماناۋي ۇلگىگە ساي تىگە الاتىن ماشينالار ساتىپ الۋ ءۇشىن تاعى 5 ملن تەڭگە راسىمدەدىم. بۇل نەسيە ماعان «كاسىپكەر» باعداراماسى ارقىلى 4 جىلعا بەرىلدى. بۇگىندە كوبىنە بالالاردىڭ كيىمدەرىن تىگىپ، جەرگىلىكتى نارىققا وتكىزىپ وتىرمىز. سۇرانىستىڭ ارقاسىندا نەسيەنى جابۋعا تابىسىمىز جەتكىلىكتى. بۇعان قوسا جۇمىسسىز 10 ايەلدى تۇراقتى جۇمىسپەن قامتىپ وتىرمىن. بۇل ۇكىمەتتىڭ اۋىل كاسىپكەرلەرىنە جاساعان قولداۋىنىڭ ناتيجەسى» ، - دەيدى ءاليا يسيموۆا.

قازىر مەكتەپ، بالاباقشادان تاپسىرىستار ءتۇسىپ جاتقان قاربالاس كەزەڭ. ءاليا الداعى ۋاقىتتا 300 شارشى مەتر تىگىن شەبەرحاناسىن تاعى 140 شارشى مەترگە كەڭەيتۋدى جوسپارلاپ وتىر.

جالپى اتىراۋ وبلىسىندا بيىل 1 تامىزعا دەيىنگى ەسەپ بويىنشا 187 كاسىپكەر 1 ميلليارد 148 ميلليون تەڭگەنىڭ نەسيەسىن العان. ونىڭ 80 پايىزى كاسىبىن جاڭادان اشقاندار.

ايتا كەتۋ كەرەك، اۋىل شارۋاشىلىعىن قارجىلاي قولداۋ قورى اۋىلدا ىسكە اسىرىلاتىن كاسىپتىڭ بارلىق تۇرىنە تومەن پايىزبەن نەسيە بەرەدى. نەسيەلەندىرۋ مەرزىمى - 5 جىلعا، اۋىل شارۋاشىلىعىنا 6,5 جىلعا دەيىن. كاسىپ باستاعاندارعا جەڭىلدىك مەرزىمى قاراستىرىلعان. كەپىلدىككە اۋىلدىق جەرلەردەگى مۇلكىن دە قويۋعا بولادى. ءبىر سوزبەن ايتقاندا، نەسيە الۋدىڭ شارتتارى جەڭىل، تالاپتارى قيىن ەمەس. اۋىل تۇرعىندارىنىڭ كاسىپپەن اينالىسۋىنا مەملەكەتتەن بارىنشا قولداۋ كورسەتىلەدى، تەك ەڭبەك ەتۋ كەرەك.