جاڭا وقۋ جىلىنىڭ كانيكۋل كۇنتىزبەسى بەلگىلى بولدى
ق ر ءبىلىم جانە عىلىم ءمينيسترىنىڭ 2019-جىلعى 29- شىلدەدەگى 337№ بۇيرىعى بويىنشا 2019 - 2020 وقۋ جىلىنىڭ باستالۋى، ۇزاقتىعى جانە كانيكۋلى كەزەڭدەرىنىڭ مەرزىمى بەكىتىلدى. اتالمىش بۇيرىق مەنشىك نىسانى مەن ۆەدومستۆولىق باعىنىستىلىعىنا قاراماستان، ورتا ءبىلىم بەرۋ نىساندارىنىڭ بارلىعىنا ورتاق.
قۇجات بويىنشا، وقۋ جىلىنىڭ باستالۋى 2019-جىلعى 1- قىركۇيەككە ساي كەلەدى.
وقۋ جىلىنىڭ ۇزاقتىعى 1-سىنىپتاردا - 33 وقۋ اپتاسى، 2-11 (12) - سىنىپتاردا - 34 وقۋ اپتاسى.
«مەيرام كۇندەرىنە تۇسكەن ساباقتار وقۋ باعدارلاماسى مازمۇنىنىڭ كىرىكتىرىلۋى ەسكەرىلە وتىرىپ، قايتالاۋعا ارنالعان ساعاتتار ەسەبىنەن كەلەسى جۇمىس كۇندەرىنە اۋىستىرىلادى»، - دەلىنگەن مينيستر بۇيىرعىندا.
وقۋ جىلى بارىسىنداعى كانيكۋل كەزەڭدەرى تومەندەگىدەي:
1-11 (12) - سىنىپتاردا: كۇزگى كانيكۋل - 7 كۇنگە، ياعني، 2019-جىلعى 28- قازان – 3- قاراشا ارالىعىنا جوسپارلانعان. قىسقى كانيكۋل - 2019-جىلعى 30- جەلتوقسان - 2020-جىلعى 8- قاڭتاردى قوسا العانداعى 10 كۇندى قامتىماق. ال كوكتەمگى - 2020-جىلعى 21- ناۋرىز – 2- ءساۋىر ارالىعىنداعى 13 كۇنگە بەلگىلەنىپ وتىر.
جاڭا وقۋ جىلىندا 1-سىنىپ وقۋشىلارىنا قوسىمشا كانيكۋل قاراستىرىلعان. 2020-جىلدىڭ 3-9 اقپان ارىلعىندا قوسىمشا 7 كۇندىك دەمالىس بەلگىلەنگەن.