ءبىرقاتار ج و و رەكتورلارى مەن «استانا وپەرا» باسشىسى كونكۋرستىق نەگىزدە تاعايىندالادى

نۇر- سۇلتان. قازاقپارات - مەملەكەت باسشىسى رەسپۋبليكالىق دەڭگەيدەگى ءبىرقاتار ۇيىمداردىڭ باسشىلارىن تاعايىنداۋ ءتارتىبىن قايتا قاراۋ تۋرالى جارلىققا قول قويدى، دەپ حابارلايدى قازاقپارات اقورداعا سىلتەمە جاساپ.

قازاقستان پرەزيدەنتى قاسىم- جومارت توقايەۆ ۇلتتىق جوعارى وقۋ ورىندارىنىڭ جانە باس پروكۋراتۋرا جانىنداعى قۇقىق قورعاۋ ورگاندارى اكادەمياسىنىڭ رەكتورلارىن، قازاقستان رەسپۋبليكاسى ۇلتتىق مۇراجايىنىڭ ديرەكتورى مەن «استانا وپەرا» مەملەكەتتىك وپەرا جانە بالەت تەاترىنىڭ باسشىسىن تاعايىنداۋ ءتارتىبىن قايتا قاراۋ تۋرالى جارلىققا قول قويدى.

جارلىققا سايكەس اتالعان مەكەمەلەردىڭ ءبىرىنشى باسشىلارىن ءتيىستى سالانى جەتەكشىلىك ەتەتىن ۋاكىلەتتى ورگاندار تاعايىندايتىن بولادى. جاۋاپتى لاۋازىمدارعا ۇمىتكەرلەردى ىرىكتەۋ كونكۋرس نەگىزىندە جۇرگىزىلەدى.

جاڭا تاعايىنداۋ ءتارتىبى كەلەسى ۇلتتىق جوعارعى وقۋ ورىندارىنا قاتىستى:

ءال- فارابي اتىنداعى قازاق ۇلتتىق ۋنيۆەرسيتەتى؛

ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتى؛

ق. ي. ساتبايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتى؛

اباي اتىنداعى قازاق ۇلتتىق پەداگوگيكالىق ۋنيۆەرسيتەتى؛

قازاق ۇلتتىق اگرارلىق ۋنيۆەرسيتەتى؛

قۇرمانعازى اتىنداعى قازاق ۇلتتىق كونسەرۆاتورياسى؛

قازاق ۇلتتىق ونەر ۋنيۆەرسيتەتى؛

ت. ق. جۇرگەنوۆ اتىنداعى قازاق ۇلتتىق ونەر اكادەمياسى؛

س. ج. اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتى؛

قازاق ۇلتتىق حورەوگرافيا اكادەمياسى؛

قازاق ۇلتتىق قىزدار پەداگوگيكالىق ۋنيۆەرسيتەتى.