+7 (701) 759 90 19
-4 °С : نۇر-سۇلتان
5 °С : الماتى
USD 388.07 EUR 427.54
RUB 6.08 CNY 55.36
جاڭالىقتار

ەلباسى بارلىق ازاماتتاردى «نۇروتان» پارتياسىنا قوسىلۋعا شاقىردى

16 تامىز 19:07
:ءبولىسۋ
ەلباسى بارلىق ازاماتتاردى «نۇروتان» پارتياسىنا قوسىلۋعا شاقىردى

نۇر- سۇلتان. قازاقپارات - قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ توراعالىعىمەن وتكەن «Nur Otan» پارتياسىنىڭ ساياسي كەڭەسى بيۋروسىنىڭ وتىرىسىندا ەلباسى پارتيالاستارىنىڭ الدىندا قانداي مىندەتتەر تۇرعانىن اتادى، دەپ حابارلايدى قازاقپارات ءتىلشىسى.

وتىرىس بارىسىندا پارتيا باعدارلامالارىنىڭ ورىندالۋ بارىسى مەن الداعى كەزەڭگە ارنالعان جۇمىستىڭ باسىم باعىتتارى قارالدى. كەڭەستى اشا وتىرىپ ەلباسى 20 جىل ىشىندە «Nur Otan» ەلدىڭ قۋاتتى ساياسي كۇشىنە اينالعانىن اتاپ ءوتتى.



«ەڭ قيىن كەزەڭدەردە ءبىزدىڭ پارتيا ءبىر ارنادا جۇمىس ىستەۋ ءۇشىن ادامدار مەن ساياساتكەرلەردى ۇيىستىرا ءبىلدى. ءبىز بەيبىتشىلىك پەن ەتنوسارالىق كەلىسىمدى، ساياسي تۇراقتىلىقتى ساقتاپ قالدىق. وسىنىڭ ارقاسىندا كوپتەگەن جەتىستىككە جەتتىك. بۇل ىنتىماق ءبىزدىڭ ەلىمىزدى «داعدارىس قىسپاعىنان» الىپ شىعىپ، ينۆەستيتسيا تارتۋعا، مىڭداعان جاڭا كاسىپورىن اشۋعا، حالىقتى جۇمىس ورىندارىمەن قامتاماسىز ەتۋگە مۇمكىندىك بەردى. ەڭ باستىسى، تاۋەلسىزدىگىمىزدى ساقتاپ، ونى نىعايتىپ الدىق، - دەدى قازاقستاننىڭ تۇڭعىش پرەزيدەنتى.

نۇرسۇلتان نازاربايەۆ جاھاندىق وزگەرىستەر جاعدايىندا پارتيا الدىندا جاڭا جانە ودان دا كۇردەلى مىندەتتەر تۇرعانىن اتاپ ءوتتى.



«قازاقستان، باسقا دا تەز دامىپ كەلە جاتقان ەلدەر سياقتى «ورتا تابىس تۇزاعىنا» تاپ بولدى. بۇكىل الەم بويىنشا ورتا تاپ كىرىستەرىنىڭ ستاگناتسياسى بايقالادى. سونداي- اق، تەرىس جاھاندىق ترەندتەر دە ەلەۋلى ىقپال ەتەتىنىن دە ايتا كەتۋ كەرەك»، - دەدى پارتيا ءتوراعاسى.

ەلباسى ازاماتتاردىڭ ءوسىپ كەلە جاتقان سۇرانىستارىنا دەر كەزىندە دەن قويۋ قاجەتتىگىن اتاپ ءوتتى.

«سونىمەن قاتار، قيىندىقتارعا قاراماستان، 2050 -جىلعا دەيىنگى ستراتەگيادا بەلگىلەنگەن باستى ماقساتتى - دامىعان 30 مەملەكەتتىڭ قاتارىنا كىرۋدى، ياعني قازاقستاندىقتاردىڭ ءومىر ءسۇرۋ ساپاسىن دامىعان ەلدەردىڭ دەڭگەيىنە كوتەرۋ ماقساتىن ۇمىتپاۋىمىز كەرەك. بۇعان قول جەتكىزۋ ءۇشىن، ءبىرىنشى كەزەكتە، تۇراقتىلىق، بىرلىك جانە ەڭ باستىسى - بارلىق قازاقستاندىقتاردىڭ ەڭبەكقورلىعى قاجەت. ءبىزدىڭ ءارقايسىمىزعا مۇنى تۇسىنگەن ابزال. بۇل جولدى بارلىق وتىزدىققا ەنگەن ەلدەر ءجۇرىپ وتكەن، - دەدى قازاقستاننىڭ تۇڭعىش پرەزيدەنتى.

نۇرسۇلتان نازاربايەۆ 2050 -جىلعا دەيىنگى ستراتەگيالىق دامۋ باعىتىنىڭ ماقساتتارىنا قول جەتكىزۋ باعىتىندا پارتيا جۇمىسىنىڭ باسىم باعىتتارىنا توقتالدى.

«بۇل ءۇشىن ءبىزدىڭ پارتيا، بىرىنشىدەن، قوعامدى بىرىكتىرىپ، ەلدىڭ ساياسي باسشىلىعىنىڭ بىرلىگىن بەكەمدەۋى ءتيىس. ىشكى بىرلىك پەن كەلىسىم بار دا - وركەندەۋ دە بولادى. ەكىنشىدەن، ناقتى پارتيالىق سايكەستىك پەن قاتاڭ ءتارتىپ، اتقارۋشى بيلىكتىڭ جاۋاپكەرشىلىگى قاجەت»، - دەدى پارتيا ءتوراعاسى.

ەلباسى ءماجىلىس پەن ءماسليحاتتارداعى سايلاۋ ناۋقانىنا ساپالى دايىندىق جۇرگىزۋدىڭ ماڭىزدىلىعىنا توقتالدى.

«الدا ءبىزدى كونستيتۋتسيالىق مەرزىمدە وتەتىن ماجىلىستەگى ماڭىزدى سايلاۋ كۇتىپ تۇر. وتكەن جىلى زاڭناماعا ەنگىزىلگەن تۇزەتۋلەرگە سايكەس، ماجىلىستەگى سايلاۋ سەكىلدى ءماسليحاتتاردا دا كەلەسى سايلاۋ العاش رەت پارتيالىق تىزىمدەر بويىنشا وتەدى. ءبىز جەڭىسكە جەتۋدى جانە ۇزاق مەرزىمدى ساياسي كوشباسشىلىقتى ماقسات ەتىپ وتىرمىز. سوندىقتان الداعى سايلاۋ ناۋقانىنا دايىندىقتى ءدال بۇگىننەن باستاۋ كەرەك، - دەدى قازاقستاننىڭ تۇڭعىش پرەزيدەنتى.

ەلباسى سونداي- اق بارلىق ازاماتتاردى مەملەكەتتىڭ وتكىر الەۋمەتتىك- ەكونوميكالىق پروبلەمالارىن شەشۋ ءۇشىن پارتياعا قوسىلۋعا شاقىردى.

«ءبىز ءوز ۇسىنىستارىن بەرە باستاعان بەلسەندى ازاماتتاردى، بلوگەرلەردى كورىپ، ەستىپ وتىرمىز. ەگەر ولار شىن مانىندە ءبىزدىڭ ەلىمىزدىڭ قامىن جەسە، ءبىز ولاردى ۇسىنىلعان يدەيالاردى جۇزەگە اسىرۋ ءۇشىن پارتيامەن بىرلەسىپ جۇمىس ىستەۋگە شاقىرامىز»، - دەدى پارتيا ءتوراعاسى.

نۇرسۇلتان نازاربايەۆ ەل ايماقتارىنداعى ازاماتتاردىڭ پروبلەمالارىن شەشۋدە «Nur Otan» پارتياسىنىڭ جۇمىسىن جانداندىرۋ قاجەتتىگىن اتاپ ءوتتى.

««Nur Otan» پارتياسىنىڭ مىندەتى - ءتيىمدى قوعامدىق جانە پارتيالىق باقىلاۋ، ءبىزدىڭ حالىققا بەرگەن بارلىق ۋادەلەردى ساپالى ورىنداۋ، «بەس ينستيتۋتسيونالدىق رەفورمانى»، پارتيانىڭ 2021 -جىلعا دەيىنگى سايلاۋالدى باعدارلاماسىن، سايلانعان پرەزيدەنت قاسىم- جومارت كەمەل ۇلى توقايەۆتىڭ باعدارلاماسىن ىسكە اسىرۋ. ولاردىڭ بارلىعى قازاقستاندىقتاردىڭ ءومىرىن جاقسارتۋعا باعىتتالعان»، - دەدى ەلباسى.

سونىمەن قاتار، «Nur Otan» پارتياسىنىڭ ءتوراعاسى قوعامنىڭ پارتياعا سەنىمىن ارتتىرۋ ماقساتىندا اقپاراتتىق- يدەولوگيالىق ستراتەگيانى قابىلداۋدىڭ ماڭىزدىلىعىنا نازار اۋداردى.

«پروبلەمالار تۋرالى اشىق ايتىپ، ولاردى ناقتى ورنىندا شەشىلۋىنە قول جەتكىزۋ قاجەت. ءبىزدىڭ مىندەتىمىز - قوعامداعى سەنىم احۋالىن قالىپتاستىرۋ. ول ءۇشىن بارلىق قوعامدىق، ساياسي كۇشتەردىڭ، بيزنەستىڭ، ينتەلليگەنتسيانىڭ، ساراپشىلار مەن ازاماتتاردىڭ ديالوگى قاجەت. بارلىق قولدا بار الاڭداردى پايدالانعان ابزال. ناقتى پروبلەمالاردى شەشۋ ءۇشىن ماقساتتى جۇمىس بولۋى ءتيىس. ءبىز ازاماتتارعا بولاشاققا دەگەن سەنىم بەرۋگە ءتيىسپىز»، - دەدى نۇرسۇلتان نازاربايەۆ.

پارتيانىڭ ساياسي كەڭەسى بيۋروسىنىڭ وتىرىسى بارىسىندا «Nur Otan» پارتياسىنىڭ پارتيالىق ءتىزىمى بويىنشا پارلامەنت ءماجىلىسى دەپۋتاتتارىنىڭ مانداتتارىن گ. ن. ءابدىقالىقوۆاعا، ن. ب. ءالىمجانوۆقا، ن. ق. اشىمبەتوۆكە جانە ج. ق. وماربەكوۆاعا بەرۋ تۋرالى شەشىم قابىلداندى.

اۆتور: ايان بەكەن ۇلى


باستى سوزدەر: بيلئك جانة ساياسات,
:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
Мухамедиярова Жанара
Мухамедиярова Жанара
954-049
رەداكتور
بەيسەن سۇلتان
بەيسەن سۇلتان
954-049

مۇراعات