ديماشقا ەڭ ۇزدىك زالدى تاڭدايمىز: مينيستر ءانشىنىڭ ا ق ش- تاعى كونسەرتى جايلى

نۇر- سۇلتان. قازاقپارات - مادەنيەت جانە سپورت ءمينيسترى اقتوتى رايىمقۇلوۆا ءانشى ديماش قۇدايبەرگەننىڭ نيۋ- يوركتەگى كونسەرتىنە دايىندىق قالاي جۇرگىزىلىپ جاتقانىن بايان ەتتى، دەپ حابارلايدى قازاقپارات ءتىلشىسى.

«ديماش قۇدايبەرگەن - ءبىزدىڭ قازاقستاننىڭ برەندىنە اينالىپ كەلەدى. قازىرگى تاڭدا وزدەرىڭىز بىلەتىندەي، ءبىزدىڭ مينيسترلىك جاس دارىنداردى بارىنشا قولداپ كەلەدى. جاس دارىندار ءۇشىن رەسپۋبليكالىق جانە حالىقارالىق بايقاۋلاردى وتكىزدىك. دارىندى بالالاردى بايقاۋلارعا، شەبەرلىك ساعاتتارى مەن فەستيۆالدەرگە جىبەرۋگە ارنالعان بيۋدجەتتىك باعدارلاما دا بار. ورەندەرىمىز ءۇمىتتى اقتاپ، ايتۋلى بيىكتەردى باعىندىرۋدا»، - دەدى اقتوتى رايىمقۇلوۆا ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

مينيستر ديماش قۇدايبەرگەن ءوزىنىڭ كاسىبي بيىگىن باعىندىرۋدا توزىمدىلىك مەن ەڭبەكقورلىقتىڭ ەڭ ۇزدىك ۇلگىسى ەكەنىن اتاپ ءوتتى.

«البەتتە، ول قازاقستاندىق ونەردى ەڭ جەتەكشى ءارى الەمدىك دەڭگەيدە تانىتىپ جۇرگەن وتە دارىندى جىگىت. وزدەرىڭىز بىلەتىندەي، مادەنيەت جانە سپورت مينيسترلىگىنىڭ قولداۋىمەن ديماشتىڭ كونسەرتى نۇر- سۇلتاندا، لوندوندا، ماسكەۋدە وتكەنىن بىلەسىزدەر. بيىل سونداي كونسەرتتى نيۋ- يوركتە وتكىزۋدى جوسپارلاپ وتىرمىز. ول ءۇشىن مينيسترلىك بەلسەندى تۇردە كەلىسسوزدەردى جۇرگىزىپ جاتىر. بىرنەشە زال ۇسىنىلدى. زالداردىڭ بىرنەشە نۇسقاسىن قاراستىرىپ، دارىننىڭ دەڭگەيىنە ساي كەلەتىن ەڭ ۇزدىگىن تاڭداپ العىمىز كەلەدى. سوندىقتان، جىلدىڭ سوڭىندا ا ق ش- تا كونسەرتىن وتكىزۋدى كوزدەپ وتىرمىز. قانداي زال بولاتىنىن ءبىز سىزدەرگە مىندەتتى تۇردە حابارلايمىز. بيلەت ساتىلىمى دا باستالادى»، - دەدى مينيستر.

ەسكە سالا كەتسەك، ديماش قۇدايبەرگەننىڭ ا ق ش- تا كونسەرتى وتەتىنى بۇعان دەيىن حابارلانعان بولاتىن.

«مادەنيەت جانە سپورت مينيسترلىگى 2019 -جىلدىڭ III توقسانىندا نيۋ- يوركتە الەمگە ايگىلى «Madison Square Garden» الاڭىندا ديماش قۇدايبەرگەننىڭ ايرىقشا شوۋ- كونسەرتىن وتكىزبەك. بۇگىنگى تاڭدا اتالعان شوۋدى ۇيىمداستىرۋ جۇمىستارى باستالىپ كەتتى»، - دەگەن ەدى بۇرىنعى مادەنيەت جانە سپورت ءمينيسترى ارىستانبەك مۇحامەدي ۇلى.

اۆتور: ايان بەكەن ۇلى