ەلىمىزدەگى بالاباقشالاردا قۇممەن سۋرەت سالۋ ۇيىرمەسى اشىلادى
قازىردىڭ وزىندە ەلورداداعى 15 تاربيە وشاعىندا قۇم تەراپياسى كەڭىنەن قولدانىلا باستاعان. ءالينۇر مەن ايلين سۋ الەمىنە ساياحات جاساۋدا. ولار قۇمنىڭ كومەگىمەن تەڭىزدەگى تىرشىلىك يەلەرىن بەينەلەيدى. بالا قيالىندا شەك جوق.
ءالينۇر سەرىك:
- مەن بالىق، تاسباقا. وسمينوگ سالدىم. ماعان سۋرەت سالعان ۇنايدى.
مامانداردىڭ ايتۋىنشا، ميلليونداعان جىل بۇرىن پايدا بولعان قۇمنىڭ سان ءتۇرى بار. بۇگىندە كۆارتستالعان قۇم كەڭ قولدانىستا. مۇنداي تەراپيانىڭ وراسان پايداسىن زەرتتەپ، زەردەلەگەن ايجان جاركەشوۆا تىڭ ادىستەمە ازىرلەگەن. قازىر ونىڭ اياسىندا ەلورداداعى 15 بالاباقشادا ارنايى ۇيىرمە جۇمىس ىستەپ تۇر. پەداگوگ- پسيحولوگتىڭ ۇسىنعان جوباسى تيىمدىلىگىن دالەلدەدى. بۇگىندە «ورلەۋ» بىلىكتىلىكتى ارتتىرۋ ورتالىعىنىڭ قولداۋىنا يە.
ايجان جاركەشوۆا، قۇممەن سۋرەت سالۋ ۇيىرمەسىنىڭ جەتەكشىسى:
- ءۇش جىل بالالارمەن جۇمىس ىستەۋ ارقىلى بالالارمەن قانداي ناتيجەلەرگە جەتكەنىمدى، ودان كەيىن ارنايى تاقىرىپتاردى قولعا الىپ، سولاردان تۋىندايتىن پەرسپەكتيۆتى جوسپار جاساپ، ءارى قاراي ونى قورعاۋعا شەشىم قابىلداپ، بيىل ادىستەمەلىك قۇرالدى قورعاپ، بۇكىل رەسپۋبليكاعا ۇسىنىلدى.
ۇيىرمەگە ءۇش جاستان اسقان بالالار قابىلدانادى. سۋرەت سالۋ، مۋزىكا ۇيلەستىرىلگەن ەرەكشە تەراپيا بالانىڭ ويلاۋ، شىعارماشىلىق قابىلەتتەرىن دامىتۋعا سەپ. باستىسى، ءبۇلدىرشىن كۇيزەلىس پەن قورقىنىشتان ارىلادى.
ازيزا جاقسىباي، قۇم تەراپياسى مامانى:
- بالالاردىڭ ساۋساق موتوريكاسىن دامىتادى، ويلاۋ قابىلەتىن دامىتادى. بۇل جەرگە كەلگەن بالالار قۇمعا سالۋ ارقىلى ىشتەگى قۇپيالارىن جەتكىزە الادى. بۇل بالالارعا ۋاقىت بەرىلەدى. ياعني جاس ەرەكشەلىكتەرىنە بايلانىستى بولادى. ورتاڭعى توپتارعا 20 مينۋتتان، ەرەسەك توپتارعا 25-30 مينۋتتان ساباق بەرۋگە بولادى.
قۇمزاردا ويناپ وتىرعان بالانىڭ قيالى ەرەك. ەرتەگىدەگى حان سارايىن دا سالادى. بۇل ورايدا قۇم تەراپياسىنىڭ بەرەرى شەكسىز. بۇلدىرشىندەر كىشكەنتاي ساۋساقتارى مايىسىپ، ارمانعا ەرىك بەرگەن. بىلىكتى ماماندار ءوز تاجىريبەسىن وڭىرلەرگە تاراتۋعا دايىن. قايتا دايارلانعان ماماندارعا ارنايى سەرتيفيكات تا ۇسىنىلادى.
www.24.kz