حالىقارالىق اسكەري ويىنداردا قازاقستاندىق ساربازدار ءۇش التىن الدى
بۇل تۋرالى ق ر قورعانىس مينيسترلىگىنىڭ باسپا ءسوز قىزمەتى حابارلايدى.
قازاق ساربازدارى «ارتيللەريالىق اتىس شەبەرلەرى» بايقاۋىندا العاشقى التىنىنا قول جەتكىزدى. جەكە جارىس، تۇنگى سپرينت جانە ەستافەتا كەزەڭدەرىنەن تۇراتىن سايىس كۇندىزگى جانە تۇنگى ۋاقىتتا ءوتتى. جارىسقا قاتىسۋشىلار بەلگىلى ءبىر باعىتتى ءجۇرىپ ءوتىپ، پۋلەمەت، اۆتومات جانە گراناتا اتقىشتان، سونداي- اق مينو اتقىشتان وق اتتى. تۇنگى ۋاقىتتا نىسانانى كوزدەۋگە تۇنگى كورۋ قۇرالدارى پايدالانىلدى. اقتىق ەستافەتادا ەلىمىزدىڭ مينا اتۋ بويىنشا كورسەتكىشتەرى جوعارى باعالانىپ، قازاقستان قۇراماسىنا جەڭىس اكەلدى.
جەڭىسكە جەتۋ تۋرالى «وڭتۇستىك» وڭىرلىك قولباسشىلىعى اسكەرلەرى قولباسشىسىنىڭ وق اتۋ بويىنشا ورىنباسارى، كوماندا جاتتىقتىرۋشىسى، پولكوۆنيك داۋرەن ەسقوجين: «جەڭىسكە بىرنەشە اي بويى تىنباي جۇرگىزگەن دايىندىق، كوماندانىڭ ۇيلەسىمدى جۇمىسى، مىقتى جاۋىنگەرلىك رۋح، تاباندىلىق پەن ايقىن ماقسات جەتەلەدى. سوندىقتان بۇل قازاقستاندىق ارتيللەريستەردىڭ ەڭبەگىنىڭ جەڭىسى»، - دەيدى.
ۇزدىك ناتيجە كورسەتكەن كەلەسى بايقاۋدىڭ ءبىرى - «سەنىمدى قابىلداۋ» . جارىستا اسكەري بايلانىس قىزمەتكەرلەرى راديوگرامما ارقىلى بايلانىستى ۇستاپ، مورزە الىپپەسىمەن حابارلامالار جىبەرىپ، تۇندە جارىق بەرۋ بەلگىلەرىن قالتا شامى ارقىلى كورسەتتى. ال سوڭعى مارەدە سايىسكەرلەر كەز كەلگەن تاسىلمەن بايلانىستى ورناتىپ، قاجەتتى دابىلدى جىبەرۋى ءتيىس. بۇل ورايدا ءبىزدىڭ قۇرام ءبىرىنشى كەزەڭدە- اق بىردەن باسىمدىق تانىتىپ، سايىستىڭ بارلىق كەزەڭدەرىندە ۇزدىك كورىندى.
ەلىمىزگە تاعى ءبىر جەڭىستى سىيلاعان - «سۇڭقار سالۋ» بايقاۋى. بۇل ءۇش كەزەڭنەن تۇراتىن سايىس. ءبىرىنشى كەزەڭ - ۇشقىشسىز ۇشۋ اپاراتتارىنىڭ دايىندىعى جانە كۇندىزگى اۋە بارلاۋى، ەكىنشى كەزەڭ - بيىكتەپ ۇشۋ، اۋە بارلاۋى جانە تۇندە ارتيللەريا وقتارىن قالىپقا كەلتىرۋ دەپ اتالادى. مۇنداعى شەشۋشى كەزەڭدە ءار ەلدەن ءۇش ۇشقىشسىز ۇشۋ قۇرىلعىلارى الما- كەزەك ىزدەۋ، انىقتاۋ جانە نىسانداردىڭ كوورديناتتارىن بەلگىلەۋ تاپسىرمالارىن ورىندادى.
ايتا كەتەرلىگى، بيىل ەلىمىزدە وتكەن حالىقارالىق ارميا ويىندارىنا رەسەي، قىتاي، بەلارۋس، وزبەكستان، قىرعىزستان، ازەربايجان، تاجىكستان، ارمەنيا، يران، سيريا، سونىمەن قاتار ۆەنەسۋەلا جانە زيمبابۆە مەملەكەتتەرى قارۋلى كۇشتەرىنىڭ اسكەري شەبەرلەرى قاتىستى.
اتالعان ءۇش بايقاۋدىڭ جەڭىمپازدارى مەن سايىس جۇلدەگەرلەرىن ماراپاتتاۋ 15 - تامىز كۇنى «وتار» اسكەري پوليگونىندا АрХО-2019 سالتاناتتى جابىلۋ ءراسىمى اياسىندا وتەدى.
