حابار ارناسى تۇسىرگەن «انا جۇرەگى» سەريالى وزبەك تىلىنە اۋدارىلدى

نۇر-سۇلتان. قازاقپارات - سوڭعى جىلدارى وزبەكستاندا قازاق كينولارى كوبىرەك كورسەتىلە باستادى. العاش «حابار» ارناسى تۇسىرگەن «انا جۇرەگى» وزبەك تىلىنە اۋدارىلدى. جۋىردا «قازاقشا بيزنەس» پەن «شال» كينوسى ۇلكەن ەكراناعا شىقتى.

بۇل ەكى ەل اراسىنداعى مادەني بايلانىستىڭ قايتا جاندانعانىن كورسەتەدى. وعان قوسا كورشى ەل پرەزيدەنتى كينو يندۋسترياسىن دامىتۋعا كوبىرەك پارمەن بەرىپ وتىر. سونىڭ نەگىزىندە «وزبەك كينو» ۇلتتىق اگەنتتىگى وتكەن جىلى 20 دان استام تاريحي تىڭ تۋىندى تۇسىرگەن. بيىل دا بۇل جوبا جۇيەلى جالعاسىن تاۋىپ كەلەدى.

ەندى تۇركىستان قالاسىندا «قازاق فيلممەن» بىرلەسىپ «ميراس» كينوسىن تۇسىرمەك. عاسىرعا جۋىق تاريحى بار وزبەك كينوسى سوڭعى جىلدارى ءبىرشاما قيىندىقتى باستان وتكەردى. كونەرگەن تەحنيكا مەن كينو تۇسىرۋدەگى شەكتەۋلەر، كينوتەاترلار مەن بىلىكتى كادرلاردىڭ جەتىسپەۋى الەمدىك كينويندۋستريانىڭ كوشىنە ىلەسۋگە قولبايلاۋ بولدى. گونوراردىڭ ازدىعىنان اكتەرلار وزگە ەلدەردى جاعالادى.

وزبەكستان پرەزيدەنتى شاۆكات ميرزييەۆ بيلىككە كەلگەن كۇننەن باستاپ وسى سالاعا ەرەكشە كوڭىل ءبولدى. ءتىپتى كينويندۋستريانى جەتىلدىرۋ جونىندەگى ارنايى جارلىققا قول قويدى. سونىڭ نەگىزىندە «وزبەك كينو» ۇلتتىق اگەنتتىگى دامۋدىڭ جاڭا جولىنا ءتۇستى، دەيدى كينو مايتالماندارى.

وليمجان داۆلاتوۆ، «وزبەك كينو» ۇلتتىق اگەنتتىگىنىڭ باسقارما باسشىسى:

- كۇنى بۇگىنگە دەيىن كينو سالاسىندا جۇرگەن ۇزدىك اكتەرلارىمىز گونورار دۇرىس تولەنبەگەندىكتەن، باسقا ەلدەرگە بارىپ سول جاقتا تۋىندىلارعا تۇسۋگە ءماجبۇر بولدى. اتاپ ايتاتىن بولساق، رەسەي، جاپونيا قازاقستانعا بارىپ كينولارعا ءتۇستى. قازىر ەلىمىزدەگى كينو سالاسىنا بولىنگەن كوڭىلدىڭ ارقاسىندا تەحنيكالارىمىز جاڭعىرىپ، زاماناۋي قۇرىلعىلار مەن مول قارجى مادەنيەت مايتالماندارىنىڭ ءوز جەرىندە كينوعا تۇسۋىنە بارلىق جاڭداي جاسالىپ وتىر. جاڭا ءداۋىر باستالدى دەۋگە بولادى.

كينەماتوگرافيا سالاسىنداعى وزگەرىستەر تىڭ تۋىندىلاردىڭ ومىرگە كەلۋىنە نەگىز بولدى. وعان قوسا بۇل سالاعا جاس رەجيسسەرلەر دا كوبىرەك تارتىلا باستادى. سونىڭ نەگىزىندە قازان قالاسىنداعى 15-كينو فەستيۆال الا تاقيالى اعايىن تۇسىرگەن «تەرمەزي» كينوسىمەن اشىلدى. بۇل ەل ءۇشىن ۇلكەن جەتىستىك.

ماتياكۋب ماتچانوۆ، اكتەر:

- كينو حالىقپەن حالىقتى جاقىنداستىرادى. كينو اراداعى قاندايدا ءبىر شەكارالاردى الىپ تاستايدى. كينونى كورىپ كەيىپكەر مەن سول ەلگە دەگەن سۇيىسپەنشىلىگىڭ ارتادى. بىزگە بىرىگىپ وسىنداي كينولار ءتۇسىرۋىمىز قاجەت.

وزبەكستاندا جالپى 50-دەن استام جەكەمەنشىك كينوستۋديا بار. باسەكە بار جەردە ساپالى تۋىندى دۇنيەگە كەلەدى، دەيدى ماماندار. ءبىر عانا سيەۆيملي تەلەارناسى كۇنى بۇگىندە دەيىن ءتورت سەريال ءتۇسىرىپتى. وعان قوسا بىلتىردان باستاپ قازاق كينولارىن وزبەك تىلىنە اۋدارىپ بەرە باستاعان. كۇنى بۇگىنگە دەيىن جالپى التى كينو اۋدارىپتى. ونىڭ ىشىندە «حابار» ارناسى تۇسىرگەن «انا جۇرەگى» تۋىندىسى بار.

قاحارمون سايداليەۆ، «Sevimli» تەلەارناسى باس رەداكتورىنىڭ ورىنباسارى:

- قازاق كينەماتورگرافتارى تۇسىرگەن «شال» كينوسىن وتكەن اپتادا ءوزىمىزدىڭ كانالدان پرەمەراسىن ۇسىندىق. كورشى ەلدىڭ اكتەرلارى اسا شەبىرلىكپەن ويناعان تۋىندىنى ءبىزدىڭ وزبەكستاندىق كورەرمەندەرىمىز جاقسى قابىل الدى. وعان قوسا اپتاسىنا ءبىر مارتە جاسالاتىن رەيتىنگتە قازاق سەريالدارى مەن كينولارى جاقسى ناتيجە الدى.

رەجيسسەر حيلال ناسيموۆ «قازاق فيلممەن» بىرگە تۇركىستاندا وزبەك جىگىتى مەن قازاق قىزىنىڭ ماحابباتى تۋراسىندا «ميراس» كوركەم فيلمىن تۇسىرمەك. بۇعان دەيىن «اباي جولى» تۋىندىسى دۇنيەگە كەلدى. انيماتسيالىق فيلمدەر دە جاسالىپ جاتىر. تاشكەنتتىڭ اۋماعىنان بولاشاقتا ينۆەستيتسيالىق قۇنى 165 ميلليون ا ق ش دوللارى بولاتىن گولليۆۋدقا ۇقساس ءۇش بىردەي كينو قالاشىعى سالىنباق. الەمدىك ساحنادا وزىندىك ەرەكشەلىگى بار وزبەك كينوسى بولاشاقتا تىڭ تۋىندىلارمەن تولىعادى.

www.24.kz