15:54, 14 - تامىز 2019 | GMT +6
قاسىم- جومارت توقايەۆ بەلگىلى ارحەولوگ زەينوللا ساماشيەۆتى قابىلدادى
نۇر- سۇلتان. قازاقپارات - قازاقستان پرەزيدەنتى قاسىم- جومارت توقايەۆ بەلگىلى ارحەولوگ زەينوللا ساماشيەۆتى قابىلدادى، دەپ حابارلايدى اقوردانىڭ باسپا ءسوز قىزمەتى.
كەزدەسۋ بارىسىندا مەملەكەت باسشىسىنا قازاقستان عىلىمىنىڭ كەيبىر ماسەلەلەرى، سونىڭ ىشىندە سوڭعى جىلدارى اشىلىپ جاتقان عىلىمي جاڭالىقتار، ارحەولوگيالىق زەرتتەۋلەر، ماماندار دايارلاۋ جۇمىسى جونىندە مالىمەت بەرىلدى.
سونىمەن قاتار، زەينوللا ساماشيەۆ قاسىم- جومارت توقايەۆقا شىعىس قازاقستان وبلىسىنداعى ساق ءداۋىرىنىڭ العاشقى كەزەڭىنە جاتاتىن قونىستارداعى قازبا جۇمىستارى، بەرەل قورعانىنداعى ارحەولوگيالىق زەرتتەۋلەردىڭ قورىتىندىسى جانە شەتەلدىك عالىمدارمەن ارىپتەستىك تۋرالى ايتىپ بەردى.
مەملەكەت باسشىسى تاريحي زەرتتەۋلەردىڭ ماڭىزدىلىعىنا توقتالىپ، سوڭعى جىلدارى وتاندىق ارحەولوگيا سالاسىندا بەلگىلى بولعان تىڭ دەرەكتەردى قازاقستاننىڭ ەجەلگى، ورتاعاسىرداعى تاريحىنىڭ جىلناماسىنا ەنگىزۋ قاجەتتىلىگىن اتاپ ءوتتى.