ارىس تۇرعىنى ءتۇن ىشىندە ءوز ءۇيىن بالتامەن قيراتىپ تاستاعان

نۇر-سۇلتان. قازاقپارات - ارىس قالاسىندا يەلەرىنىڭ ءوز ۇيلەرىن وزدەرى قيراتۋ جاعدايى تىركەلىپ جاتىر، دەپ حابارلايدى قازاقپارات ءتىلشىسى.

تۇركىستان وبلىسى اكىمىنىڭ كەڭەسشىسى ساكەن قالقامانوۆ Facebook-تەگى پاراقشاسىندا ارىس قالاسىنىڭ تۇرعىندارىنىڭ ءبىرى تۇنگى ۋاقىتتا تولە ءبي كوشەسى 183 مەكەنجايداعى ءۇيىن بالتامەن، سۇيمەنمەن قيراتىپ تاستاعاندىعىن جازدى.

«ءبىرىنشى ۆيدەونى قۇرىلىسشىلار تۇسىرگەن. ول كەزدە ءۇي يەسى باسپاناسىن جوندەۋ تۋرالى ۇسىنىسپەن كەلىسپەگەن. ول جارىلىس سالدارىنان كەلگەن شىعىندى اسىرا سىلتەپ، ءۇيدى ءسۇرىپ تاستاۋدى تالاپ ەتكەن. ارينە، قۇرىلىسشىلار كورشىسىنىڭ سامان كىرپىشتەن سالىنعان، كەيىن قيراپ قالعان ءۇيىن ءسۇرىپ تاستاپ، ورنىنا جاڭا ءۇي سالىپ جاتقان كەزدە كەز كەلگەن ادامدا قىزعانىش تۋۋى مۇمكىن. ءبىراق، ءوز مۇلكىڭدى قۇرتۋ - تىپتەن ميعا سىيمايتىن جاعداي. كەلەسى كۇنى ءۇيدىڭ كەلبەتى باسقاشا بولىپ تۇردى»، - دەپ ءسوزى دالەلدى بولۋ ءۇشىن ساكەن قالقامانوۆ ءوز پاراقشاسىندا ۆيدەو سالىپ وتىر.

وكىنىشكە قاراي، مۇنداي جاعداي قالانىڭ باسقا ءبىر جاعىندا دا تىركەلگەنى حابارلاندى.

«ماداليەۆ كوشەسى 125 ا مەكەنجايىندا تۇراتىن رامانقۇلوۆ دەگەن بىرەۋ تۇندە جاپ-جاقسى تۇرعان ءوز ءۇيىنىڭ بىت-شىتىن شىعارعان. ال نەگىزىنەن ول ۇيدە بار-جوعى بىرنەشە تەرەزە سىنعان. سىلاعىن كۇرەكپەن قىرىپ، شاتىرىن قيراتپاق بولعان. ءسوزىمىز دالەلدى بولۋ ءۇشىن فوتولاردى ۇسىنامىز. نەلىكتەن ولاي ەتتىڭ دەگەن سۇراققا ءۇي يەسى «كوميسسيا قاشان كەلەدى؟» دەپ جاۋاپ بەرگەن»، - دەپ جازادى قالقامانوۆ.

ەسكە سالا كەتسەك، بۇعان دەيىن ارىستىقتارعا بەرىلەتىن 100 مىڭ تەڭگەنىڭ قاشان اۋدارىلاتىنى حابارلانعان بولاتىن.