قورعانىس مينيسترلىگىندە جاڭا بولىمشە قۇرىلدى

نۇر-سۇلتان. قازاقپارات - العاش رەت جۇرگىزىلگەن قىزمەتتىك تالداۋ ناتيجەلەرىمەن قورعانىس مينيسترلىگى جانە باس شتاب ورتالىق اپپاراتىنىڭ قۇرىلىمىن جەتىلدىرۋ اياسىندا بىرنەشە جاڭا بولىمشە قۇرىلدى، دەپ حابارلايدى ق ر قورعانىس مينيسترلىگىنىڭ باسپا ءسوز قىزمەتى.

سولاردىڭ ءبىرى - ستراتەگيالىق تالداۋ جانە دامىتۋ دەپارتامەنتى. دەپارتامەنتكە مەملەكەتتىك جوسپارلاۋ جۇيەسىنىڭ قۇجاتتارىن ازىرلەۋ، ونىڭ ىشىندە قارۋلى كۇشتەردىڭ قۇرىلىسى مەن ونى دامىتۋدا، ەلىمىزدىڭ اسكەري قاۋىپسىزدىگى مەن قورعانىس قابىلەتىن قامتاماسىز ەتۋدە تۇجىرىمدامالىق ءتاسىلدى ۇيلەستىرۋ تاپسىرىلدى.

قورعانىس مينيسترلىگىنىڭ ستراتەگيالىق جوسپارىن جۇزەگە اسىرۋ بارىسىندا دەپارتامەنتكە قارجى جانە ماتەريالدىق رەسۋرستاردى، سونىمەن قوسا ەرەكشە نازار اۋدارۋدى تالاپ ەتەتىن جەتەكشى قىزمەت باعىتتارىن تالداۋ جانە انىقتاۋدى باقىلاۋ جۇكتەلدى.

قاۋىپسىزدىككە قاتىستى بولجانعان تاۋەكەلدەر مەن قاۋىپ-قاتەردى ەسكەرە وتىرىپ، كۇش قازاقستان قورعانىس الەۋەتىنىڭ، قارۋلى كۇشتەردىڭ قۇرىلىسىنىڭ ساندىق جانە ساپالى وسۋىنە ىقپال ەتەتىن وڭتايلى شەشىمدەردى ىزدەۋگە باعىتتالاتىن بولادى.

جاڭا دەپارتامەنتتى سايدمۇرات تاڭىربەرگەن باسقارادى. ونىڭ ۇلتتىق قاۋىپسىزدىكتى قامتاماسىز ەتۋدە، سونداي-اق قورعانىس-ونەركاسىپ كەشەنى شەڭبەرىندە ستراتەگيالىق جوسپارلاۋ اۋقىمىندا تاجىريەسى بار.

1999-جىلدان 2002-جىل ارالىعىندا سايدمۇرات باپان ۇلى قاۋىپسىزدىك كەڭەسى حاتشىلىعىندا سەكتور مەڭگەرۋشىسى، ىشكى جانە اسكەري قاۋىپسىزدىك بولىمىندە، سونداي-اق حاتشىلىق مەڭگەرۋشىسىنىڭ ورىنباسارى لاۋازىمدارىندا قىزمەت ەتكەن.

2015-جىلدان 2019-جىل ارالىعىندا قاۋىپسىزدىك كەڭەسى حاتشىلىعىنىڭ مەڭگەرۋشىسى قىزمەتىن اتقاردى. مەملەكەتتىك ماراپاتتارى بار. اتاپ ايتقاندا، «پاراسات»، «قۇرمەت» وردەندەرى، «ەرەن ەڭبەگى ءۇشىن» مەدالى.