+7 (701) 759 90 19
3 °С : نۇر-سۇلتان
7 °С : الماتى
USD 389.94 EUR 433.50
RUB 6.10 CNY 55.13
جاڭالىقتار

سماعۇل ەلۋباي: پرەزيدەنت اشارشىلىق تۋرالى فيلم ءتۇسىرۋ يدەياسىن قۇپتادى

13 تامىز 16:33
:ءبولىسۋ

نۇر-سۇلتان. قازاقپارات - جازۋشى سماعۇل ەلۋباي قازاقپارات تىلشىسىنە ق ر پرەزيدەنتى قاسىم-جومارت توقايەۆپەن نە تۋرالى سويلەسكەنىن ايتىپ بەردى، دەپ حابارلايدى قازاقپارات ءتىلشىسى.

جازۋشى مەن پرەزيدەنت اراسىنداعى اڭگىمە اشارشىلىق، ءتىل تاعدىرى، ادەبيەت احۋالى، ەلدىڭ كوڭىل-كۇيى تاقىرىپتارىنىڭ اينالاسىندا ءوربىپتى.

«پرەزيدەنتكە ەڭ ءبىرىنشى اشارشىلىق تۋرالى ايتتىم. 2021-جىلى 1921-جىلعى اشارشىلىققا 100 جىل، 1930-جىلدارداعى اشارشىلىققا 90 جىل تولادى. قاسىرەتتى داتاعا 1,5 جىل عانا ۋاقىت قالدى. سول زۇلماتتا قۇربان بولعان 4 ميلليون ارۋاقتى ۇلىقتاۋ شارالارى جونىندە ۇسىنىستار ايتتىم.

«ەسكەرتكىشتەر قويىلدى عوي. دەگەنمەن، ميلليونداعان قۇربانعا ۇلكەن مەموريال قويساق لايىقتى. ۇلى تراگەدياعا لايىقتى كوركەم فيلم تۇسىرسە، عاجاپ بولار ەدى. اشارشىلىق تۋرالى ءوزىمىز جازعان «اق بوز ءۇي» رومانىنىڭ سوڭعى تاراۋى بويىنشا سەناري دايىنداعان بولاتىنمىن. سول ماسەلەنى سىزگە قۇلاققاعىس قىلىپ وتىرمىن»، - دەدىم. ول كىسى قۇپتايتىنىن ايتتى.

«سەناريدى ماعان جىبەرىڭىز» دەگەن سوڭ، بۇگىن جىبەردىم. ءسويتىپ، قۇداي قالاسا، اتالمىش داتاعا وراي «اق بوز ءۇي» دەگەن سەناري بويىنشا فيلم ءتۇسىرۋ جۇمىسىنا كىرىسۋىمىز مۇمكىن. مەن وسىعان قۋاندىم. ايتايىن دەگەن نەگىزگى شارۋامنىڭ ءبىرى وسى بولاتىن»، - دەيدى قالامگەر.

سماعۇل ەلۋباي قازاق ءتىلىنىڭ تاعدىرى دا اڭگىمەگە ارقاۋ بولعانىن ايتادى.

«سودان كەيىن ءتىل جونىندە ايتتىق. ءتىل زاڭىنىڭ قابىلدانعانىنا 30 جىل تولادى. وسى جونىندە دە شۇعىل ءىس-ارەكەت كەرەكتىگىن، جۇرت كۇتىپ وتىرعانىن جەتكىزدىم. مەملەكەتتىك ءتىلدىڭ مارتەبەسى ءالى دە ءوز دەڭگەيىنە كەلگەن جوق دەگەن پىكىر ايتتىق. پرەزيدەنت ونى دا قولدايتىنىن ءبىلدىردى»، - دەيدى ول.

اڭگىمە بارىسىندا پرەزيدەنت «قازاق فيلم» كينوستۋدياسىن دامىتۋعا كۇش سالىناتىنىن ايتقان كورىنەدى. سونداي-اق كينودراماتۋرگ «قازاق فيلم» كينوستۋدياسىن ەلورداعا كوشىرۋگە قارسى ەكەنىن دە ايتقان ەكەن.

«ول كىسى: «بۇعان نۇكتە قويىلدى. ەندى تەك «قازاق فيلمدى» دامىتامىز»، - دەدى. بۇل دا مەن ءۇشىن جاقسى جاڭالىق بولدى»، - دەدى كينوگەر.

«ول كىسى اباي حاكىمنىڭ 175 جىلدىعىنا ءوز ۇلەسىڭىزدى قوساتىن شىعارسىز دەگەندى ايتتى»، - دەيدى سماعۇل ەلۋباي.

جازۋشىنىڭ ويىنشا، اباي تۋرالى تالاي فيلم تۇسىرىلگەنىمەن، سونىڭ ەشقايسىسى ابايعا لايىق دەڭگەيدە شىقپاعان.

«ابايدىڭ اتىن پايدالانىپ، ءبىر جىلدىڭ ىشىندە لايىقتى كوركەم فيلم ءتۇسىرۋ وتە اۋىر نارسە. مەن ونى كينوگەر رەتىندە ايتىپ وتىرمىن. ول مۇمكىن ەمەس دۇنيە . سوندىقتان اسىقپاۋ كەرەك دەگەندى ايتتىق. ول كىسى ءبارىن جازىپ الىپ وتىردى. وسىنداي-وسىنداي اڭگىمەلەر ايتىلدى. ول كىسى ەلدەگى پوەزيا مەن پروزانىڭ دامۋى قالاي دەگەن سۇراق قويدى.

«پوەزيانىڭ دەڭگەيى وتە جوعارى دەڭگەيدە. پروزا جايلى ولاي ايتۋ قيىن. ويتكەنى، قازىر جۇرت كولەمدى دۇنيەنى وقىمايتىن بولدى. ءبىزدىڭ پروزامىزعا قايتا قۇرۋ، ۇلكەن وزگەرىستەر كەرەك سياقتى. بۇل جالعىز قازاق پروزاسىنىڭ باسىنا تۇسكەن ناۋبەت ەمەس، جالپى الەمدىك پروزانىڭ پروبلەماسىنا اينالىپ وتىر»، - دەگەن پىكىر ايتتىم. پرەزيدەنت ادەبيەت، مادەنيەت، كينو سالاسىنا وتە قامقور ازامات ەكەنىن كورسەتتى»، - دەگەن قالامى قارىمدى جازۋشى كەزدەسۋدەن كوتەرىڭكى رۋحپەن شىققانىن ايتادى.

«پرەزيدەنتكە كوڭىلىمىزگە ءارتۇرلى ويلار كەلىپ بارعان ەدىك. شىققاندا كوڭىلىمىز تولىپ، وپتيميستىك رۋحتا قايتتىق. ياعني، ەلباسى ايتپاقشى، پرەزيدەنتىمىزدى ءبارىمىز تۇگەل قولداۋىمىز كەرەك ەكەن. سوندا عانا ءبىزدىڭ كوك تۋىمىز تۇعىرلى بولماق دەگەن وي تۇيدىك. بۇكىل ەل، اعايىن كوك تۋدىڭ ماڭايىنا شوعىرلانۋ قاجەت قازىرگى تاڭدا. قاسىم-جومارت توقايەۆ سوعان لايىقتى تۇلعا دەپ ايتار ەدىم»، - دەپ ءتۇيدى جازۋشى.

ايتا كەتەيىك، كەشە قاسىم-جومارت توقايەۆ جازۋشى جانە كينودراماتۋرگ سماعۇل ەلۋبايدى قابىلداعان بولاتىن.


باستى سوزدەر: قوعام,
:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات