تۇرمىسى تومەن ازاماتتار كرەديتىن جاپقىزۋ ءۇشىن قايدا جۇگىنۋ كەرەك؟
باس بانكير قازاقستاندىقتاردىڭ بورىش جۇكتەمەسىن ازايتۋ ماقساتىندا ۇكىمەت پەن ۇلتتىق بانك ەكىنشى دەڭگەيدەگى بانكتەر جانە ميكروقارجى ۇيىمدارىمەن بىرلەسىپ ەكى باعىتتا جۇمىس ىستەپ جاتقانىن اتاپ ءوتتى.
ونىڭ سوزىنشە، ءبىرىنشىسى حالىقتىڭ الەۋمەتتىك وسال توپتارى ءۇشىن كەپىلسىز تۇتىنۋشىلىق قارىز بويىنشا 300 مىڭ تەڭگەگە دەيىنگى بەرەشەكتى وتەۋ بولىپ تابىلادى.
دوسايەۆ ازاماتتاردىڭ تىزىمدەرى بويىنشا بەرەشەك جايلى اقپارات جينالعانىن جەتكىزدى.
سونداي-اق، قارىزى وتەلگەندەردىڭ دە ءتىزىمى جاسالعانىن مالىمدەدى.
ۇلتتىق بانك ءتوراعاسى بەرەكشەكتى وتەۋ تامىزدىڭ سوڭىنا دەيىن اياقتالاتىنىن ءبىلدىردى.
دوسايەۆ كرەديتى وتەلەتىن قازاقستاندىقتار بانكتەر مەن ميكروقارجى ۇيىمدارىنا ءوتىنىش جازبايتىنىن ەسكەرتتى.
ونىڭ ايتۋىنشا، بەرەشەكتى وتەۋ جۇمىسىن كرەديتورلار دەربەس جۇرگىزەدى.
سودان كەيىن كرەديتورلار ءاربىر قارىز الۋشىعا ءتيىستى حابارلاما جىبەرەدى.
«ەكىنشى باعىت - بارشا قازاقستاندىقتىڭ كەپىلسىز تۇتىنۋشىلىق قارىزى بويىنشا 2019-جىلعى 1- شىلدەدە ەسەپتەلگەن ايىپپۇلى مەن ءوسىمپۇلىن ەسەپتەن شىعارۋ. 30- شىلدەدە بانكتەر مەن ميكروقارجى ۇيىمدارى 33 ميلليارد 600 ميلليون تەڭگەگە 1 ميلليون 200 مىڭ ازاماتتىڭ ايىپپۇلى مەن ءوسىمپۇلىن كەشىردى»، - دەدى دوسايەۆ.
ول 20- تامىزعا دەيىن ۇلتتىق بانك بانكتەر جۇمساعان شىعىننىڭ 30 پايىزىن وتەيتىنىن العا تارتتى.