نۇر- سۇلتاندا «شىعىس قىرلارى» فەستيۆالى ءوتتى
«ەتنوس كۇنىنە» وراي وتكىزىلگەن ءىس- شارا جىل بويى ۇيىمداستىرىلاتىن ءىس- شارالاردىڭ توپتاماسى. بىرنەشە جىل قاتارىنان وتكىزىلىپ كەلە جاتقان ءداستۇرلى فەستيۆال ەلوردادا تۇراتىن ەتنوستاردىڭ سالت- ءداستۇرى مەن مادەنيەتىن دارىپتەۋگە، ەتنومادەني بىرلەستىكتەردىڭ جەتىستىكتەرىن كورسەتۋگە نەگىزدەلگەن.
شىعىستىڭ سان قىرلى مادەنيەتى مەن كوز قىزىقتىراتىن سۇلۋلىعىن، كاۆكازدىقتاردىڭ ايبىندىلىعىن، ەۋروپانىڭ تالعامپازدىعىن، سلاۆيانداردىڭ دۋمانىن اتالمىش فەستيۆالدە كورەي، باشقۇرت، تاتار، ۇيعىر، وزبەك، قىرعىز، كۇرد، دۇڭگەن جانە قاراقالپاق ەتنومادەني ورتالىقتارى كورسەتتى.
قازاقستان - كوپۇلتتى مەملەكەت. ەلىمىزدە تۇرىپ جاتقان بارلىق حالىقتار تەڭ قۇقىلى جانە ءار ەتنوستىڭ ءتىلىن، ءدىلىن، ءدىنىن، تاريحى مەن مادەنيەتىن ۇمىتپاي، ونى ساقتاپ، كوبەيتۋگە جاعداي جاسالعان.
قازاقستان قوعامدىق كەلىسىم جانە جالپى ۇلتتىق بىرلىكتىڭ الەمدەگى تەڭدەسى جوق ۇلگىسىن قالىپتاستىرا ءبىلدى. مەملەكەتىمىزدە ءومىر ءسۇرىپ جاتقان حالىقتار اراسىندا جىلى قارىم- قاتىناس ورناعان، ءوزارا تۇسىنىستىك نىعايعان، ءبىر- بىرىمەن سىيلاستىقتا جانە مادەنيەتى بىتە قايناسقان.
كورەرمەندەر فەستيۆالدە تەاترلاندىرىلعان قويىلىمدار، فولكلورلىق جانە ۇلتتىق ۇجىمدار ونەرىن، سونىمەن قاتار ۇلتتىق اندەر مەن بيلەردى تاماشالادى.
فەستيۆال كورەي ەتنومادەني ورتالىعى ۇجىمىنىڭ كونسەرتتىك باعدارلاماسىمەن باستالدى.