ارىستاعى ساپەر اسكەرلەر سينگاپۋردىڭ جەر كولەمىنەن ەكى ەسە ۇلكەن اۋماقتى تازالادى
اسكەري قالاشىقتى قالپىنا كەلتىرۋ جۇمىستارى ءجۇرىپ جاتىر، دەپ حابارلايدى قازاقپارات ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.
اپتا سايىنعى ساپارى بارىسىندا قورعانىس ۆەدومستۆوسىنىڭ باسشىسى قالاشىقتاعى جوندەۋ جۇمىستارىمەن تانىسىپ، ورىندالعان جۇمىستاردىڭ ناتيجەسى تۋرالى باياندامالاردى تىڭدادى. قورعانىس ءمينيسترى قويمانى ساپالى تازارتۋ جانە جەرگىلىكتى تۇرعىنداردىڭ قاۋىپسىزدىگىن قامتاماسىز ەتۋ - باستى مىندەت ەكەنىن ايتتى ءارى قالپىنا كەلتىرۋ جانە جويۋ جۇمىستارىنا قاتىستى بىرنەشە تاپسىرمالار بەردى.
ارىستا اسكەري قىزمەتشىلەر توتەنشە جاعداي سالدارىن جويىپ جاتىر. وق- دارىلەردىڭ بولشەكتەرىن ىزدەپ تاۋىپ، كوزىن قۇرتۋعا ينجەنەر- ساپەر توپتارى جۇمىلدىرىلعان. قازىرگە دەيىن ولار 150 مىڭ بولشەكتى تاپتى. بۇگىنگە دەيىن ساپەرلار 1250,7 شارشى كيلومەتر - سينگاپۋردىڭ جەر كولەمىنەن ەكى ەسە ۇلكەن اۋماقتى تازالادى.
وق- ءدارى بولشەگى تابىلعان جەرگە باراتىن جىلجىمالى توپ جەرگىلىكتى تۇرعىندارمەن بىرگە جۇمىس ىستەپ جاتىر.
قورعانىس مينيسترلىگى حالىقتىڭ قاۋىپسىزدىگىن قامتاماسىز ەتۋ ماقساتىندا ارىس قالاسىنىڭ تۇرعىندارىنا وق- دارىلەردىڭ بولشەكتەرى مەن باسقا دا كۇدىكتى زاتتاردى تاپقان كەزدە موبيلدى توپقا شۇعىل حابارلاۋدى جانە ءوز بەتىنشە ەشقانداي ءىس- ارەكەت جاساماۋدى وتىنەدى.
