قاسىم-جومارت توقايەۆ «بارىس» كلۋبىن پرەزيدەنت كۋبوگىنداعى جەڭىسىمەن قۇتتىقتادى

نۇر-سۇلتان. قازاقپارات - مەملەكەت باسشىسى قاسىم-جومارت توقايەۆ شايبالى حوككەيدەن ق ر پرەزيدەنتى كۋبوگىندا جەڭىسكە جەتكەن ەلوردالىق «بارىس» كومانداسىن قۇتتىقتادى، دەپ حابارلايدى قازاقپارات.

«بارىس حوككەي كومانداسى حالىقارالىق كلۋبتىق تۋرنيردە داستۇرگە اينالعان پرەزيدەنت كۋبوگىن ۇتىپ الدى. حوككەيشىلەردى جانە جاتتىقتىرۋشىلاردى تاماشا جەڭىستەرىمەن قۇتتىقتايمىن!»، - دەپ جازدى ق. توقايەۆ Twitter- دە.

ەسكە سالايىق، شايبالى حوككەيدەن ق ر پرەزيدەنتىنىڭ كۋبوگىنا ارنالعان10-حالىقارالىق تۋرنير ەلوردادا 7- تامىز كۇنى باستالدى. «بارىس ارەنا» مۇز ايدىنىندا جەرگىلىكتى «بارىس» پەن قازان قالاسىنىڭ «اك بارسى» اراسىنداعى العاشقى ماتچتى مەملەكەت باسشىسى قاسىم-جومارت توقايەۆ بارىپ تاماشالادى.

11- تامىز كۇنى مەرەيتويلىق تۋرنير مارەسىنە جەتتى. ونىڭ چەمپيونى نۇر-سۇلتان قالاسىنىڭ «بارىس» كومانداسى بولدى. بۇعان دەيىنگى ءۇش كەزدەسۋىن دە جەڭىسپەن اياقتاعان اتالمىش كلۋب بۇگىن رەسەيدىڭ «سالاۆات يۋلايەۆ» كومانداسىمەن شەبەرلىك بايقاستى.