ايت كۇنى جاعدايى بار كىسىلەر قۇربان شالادى - باس ءمۇفتي
«قۇربان ايت - ءيسى مۇسىلماننىڭ ۇلىق مەيرامى. ايت كۇندەرى اعايىن-جۇرت ءبىر- بىرىنە: «ايت قابىل بولسىن!» ايتىپ، ىزگى تىلەكتەرىن جەتكىزىپ، العىستارىن جاۋدىرادى. وسى رەتتە سىزدەرگە ىزگى نيەتپەن جاراتقاننىڭ جاقسىلىعىن تىلەيمىن.
تۋىس پەن باۋىرعا، كورشى مەن دوس-جارانعا ايتتاپ بارۋ، قادىرلى قوناققا ايتتىق بەرىپ، ۇلكەننىڭ العىسى مەن باتاسىن الۋ - سوناۋ زاماننان جالعاسىپ كەلە جاتقان مۇسىلماندىق ءداستۇرىمىز. وسى يگى ءداستۇردى قوعامدا قايتا جاڭعىرتىپ، جاستارعا ۇلگى-ونەگە كورسەتۋگە شاقىرامىن! «قۇربان» ءسوزى «جاقىن بولۋ»، «جاقىنداۋ» دەگەن ۇعىمداردى بىلدىرەدى. مۇسىلمان بالاسى ايت كۇنى قۇرباندىق شالۋ ارقىلى اللاعا دەگەن اق نيەتىن پاش ەتەدى»، - دەلىنگەن باس ءمۇفتيدىڭ قۇتتىقتاۋىندا.
سونداي-اق، قازاقستان مۇسىلماندارى ءدىني باسقارماسىنىڭ ءتوراعاسى ءوزىنىڭ قۇتتىقتاۋىندا قاسيەتتى مەركە كەزىندە مال باعاسىن شارىقتاتپاي، پايداعا ەمەس، ساۋاپقا بولەنۋگە شاقىردى.
«قۇربان ايتتا ورىندالاتىن ەڭ قايىرلى امال - قۇربان شالۋ. ايت كۇنى جاعدايى بار كىسىلەر قۇربان شالىپ، ونى قاراۋسىز قالعان قاريالار مەن جەتىمدەرگە، كوپبالالى وتباسىلارعا تاراتىپ، ساۋاپ الۋعا تىرىسادى. الايدا، ايت كۇندەرى مال باعاسى قىمباتتاپ كەتەتىن جاعداي جيى ورىن الادى. وسى رەتتە وتانداستارىمدى مال باعاسىن شارىقتاتپاي، پايداعا ەمەس، ساۋاپقا بولەنۋگە ۇندەيمىن. ويتكەنى، قۇربان ايت - قاناعات پەن قايىرىمدىلىقتىڭ مەرەكەسى»، - دەدى باس ءمۇفتي.