قاسيەتتى قۇربان ايت باستالدى

نۇر-سۇلتان. قازاقپارات - بۇگىن كۇللى مۇسىلمان ءۇشىن ۇلىق سانالاتىن قۇرباي ايت مەرەكەسى باستالدى، دەپ حابارلايدى قازاقپارات ءتىلشىسى.

ورازا ايتتان كەيىن 70 كۇن وتكەندە كەلەتىن قۇربان ايت مەرەكەسىن كوپشىلىك مۇسىلمان 3 كۇن قاتارىنان تويلايدى. بيىل بۇل كۇندەر تامىز ايىنىڭ 11،12،13 جۇلدىزدارىنا ءدوپ كەلىپ وتىر. قازاقستاننىڭ «ەڭبەك تۋرالى» زاڭى بويىنشا، 2005-جىلدان بەرى قۇربان ايتتىڭ ءبىرىنشى كۇنى دەمالىس بولىپ كەلەدى. بيىل ول 11 تامىزعا، ياعني، جەكسەنبىگە ءتۇسىپ تۇر. سوندىقتان، قازاقستاندىقتار قۇربان ايت مەرەكەسىنە وراي ارتىق دەمالىس المايدى.

مەرەكەنىڭ باستى ءراسىمى - جاراتۋشى رازىلىعى ءۇشىن قۇربان شالۋ. بۇل ءراسىم ءدىني نانىم بويىنشا يبراھيم پايعامبار زامانىنان بەرى كەلە جاتىر دەپ ەسەپتەلەدى.

قازاقستان مۇسىلماندارى ءدىني باسقارماسىنىڭ رەسمي سايتىندا قۇربان شالاتىن ادامنىڭ نيساپ مولشەرىندە ارتىق داۋلەتى بولعانى ابزال ەكەنى جازىلعان. ياعني، كۇندەلىكتى تىرشىلىكتە قولدانىلاتىن نەگىزگى قاجەتتەر مەن قارىزداردان بولەك 85 گرام التىننىڭ قۇنىنا تەڭ داۋلەتى بار بولۋى ءتيىس.

«ءبىراق، بۇل جاعدايى تومەن ادام قۇربان شالماسىن دەگەن ءسوز ەمەس. ونداي قۇرباندىق ءناپىل قۇربان ۇكىمىنە جاتادى»، - دەلىنگەن باسقارمانىڭ مالىمەتىندە.

شاريعات بويىنشا، اقىل-ەسى دۇرىس، باليعات جاسىنا تولعان مۇسىلمانعا ءوزىنىڭ تۇرعىلىقتى مەكەنىندە قۇربان شالۋ پارىز ەتىلەدى.

قۇرباندىققا تۇيە، قوي، ەشكى، سيىر شالۋعا بولادى. تۇيە مەن سيىردى 7 ادام بىرلەسىپ نەمەسە ءبىر ادام جەكە شالا الادى.

«قۇربان مالىن نيەتتى ادامنىڭ ءوزى شالسا، ساۋابى الدەقايدا كوپ دەپ سانالادى. الايدا، باسقا ادامعا وكىلدىك بەرۋگە دە بولادى. ول ءۇشىن تەلەفون ارقىلى نەمەسە حات-حابار ارقىلى شارانى بىرەۋگە ناقتى ۋاقىتىن ايتىپ تاپسىرۋ قاجەت. وكىلدىكتى قابىلداعان ادام قۇرباندىق شارتىن نيەتتى ادامنىڭ ايتۋى بويىنشا اتقارادى»، - دەيدى ءدىن وكىلدەرى.

قۇربان شالۋ كەزىندە قازاقتىڭ مال سويۋعا قاتىستى ەجەلدەن كەلە جاتقان ادەپ نورمالارى قاتاڭ ساقتالادى. اتاپ ايتساق، مال باۋىزدايتىن پىشاق مالدىڭ كوز الدىندا قايرالماۋى كەرەك. قۇربانعا شالىناتىن مالدى سول جامباسىنا جىعىپ، كەۋدەسىمەن قۇبىلاعا قاراتقان قالپى قۇربان شالۋعا نيەت ەتۋى شارت. باۋىزدار الدىندا «ءبيسميللا، اللاھۋ اكبار!» دەپ ايتىپ، مالدىڭ وڭەشىن، كەڭىردەكتى جانە مويىننىڭ ەكى جاعىنداعى تامىردى ءبىر مەزەتتە كەسۋ قاجەت. مالدىڭ قانى تولىق اعىپ، جانى شىققانشا تەرىسىن ىرەپ، ەتىن بۇزباعان ءجون.

قازاقستان مۇسىلماندارى ءدىني باسقارماسى جىلداعى ادەت بويىنشا قۇرباندىققا قانداي مال شالىنبايتىنىن دا حابارلادى.

قۇربانعا شالىنعان مال ەتىنىڭ 1/3 بولىگىن ءوزىنىڭ وتباسى مەن بالا- شاعاسىنا، 1/3 بولىگى تۋعان-تۋىستارى مەن كورشىلەرىنە، 1/3 بولىگىن كەدەي جانە مۇقتاج جاندارعا ۇلەستىرۋ ابزال. ءدىن ماماندارى قۇربانعا شالىنعان مالدىڭ تەرىسى قاساپشىعا قىزمەت اقىسى رەتىندە بەرىلمەيتىنىن ەسكەرتەدى. ونى ساتىپ، اقشاسىن ساداقا ەتۋ قاجەت.