+7 (701) 759 90 19
-16 °С : نۇر-سۇلتان
-3 °С : الماتى
USD 383.95 EUR 429.26
RUB 6.16 CNY 55.02
جاڭالىقتار

قازاق ازاماتى قىتايدا ۇزدىك مودەل اتاندى - شەتەلدەگى قازاق ءتىلدى ب ا ق- قا شولۋ

10 تامىز 11:24
:ءبولىسۋ
قازاق ازاماتى قىتايدا ۇزدىك مودەل اتاندى - شەتەلدەگى قازاق ءتىلدى ب ا ق- قا شولۋ

نۇر-سۇلتان. قازاقپارات - «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

قازاق ازاماتى قىتايدا ۇزدىك مودەل اتاندى - قىتايدىڭ «ورتالىق حالىق راديوسى» (CNR)



قازىرگى كۇنى الەمدە ءسان ونەرى قارقىندى دامىپ جاتىر. سوندىقتان دا وسى سالادا جۇمىس ىستەيتىن بويشاڭ ءارى سىمباتتى مودەلدەرگە دەگەن سۇرانىس تا جوعارى. مىنە، وسىنداي ونەر جولىندا باعىن سىناپ جۇرگەن سەرى جىگىتتەردىڭ ءبىرى - قىتايدىڭ ۇزدىك مودەلى اتانعان قانداسىمىز سەرجان باعدات ۇلى، دەپ جازادى قىتايلىق kazakcnr.com سايتى.



اتالعان دەرەككوزدىڭ مالىمەتىنشە، قىتايدا تۇراتىن قانداسىمىز سەرجان باعدات ۇلى 2018-جىلى قىتايدىڭ كايفىڭ قالاسىندا وتكەن مەملەكەتتىك «جۇلدىزدى مودەلدەر» باسەكەسىنە قاتىسقان. قىتايدىڭ ءار وبلىسىنان سايدىڭ تاسىنداي ىرىكتەلگەن 60 قا جۋىق قاتىسۋشى اراسىنان سىمباتىمەن، دارا ونەرىمەن وزىپ، سەرجان باس جۇلدەنى قانجىعالاعان. كەسكىن-كەلبەتىمەن قىتايدى تامساندىرىپ جۇرگەن سەرى جىگىتتىڭ بويى 191 سانتيمەتر.



«سەرجان باعدات ۇلى شىڭجاڭ اسكەري ينستيتۋتىندا ءبىلىم العان. ول كەيىن ۋحان قالاسىنداعى جوعارى وقۋ ورنىندا دەنە شىنىقتىرۋ ماماندىعى بويىنشا ءبىلىمىن جەتىلدىرگەن. قاجىرلى ەڭبەك، ۇزدىكسىز تالپىنىسىنىڭ ناتيجەسىندە قىتايدىڭ ۇزدىك مودەلى اتاعىنا قول جەتكىزگەن. قازىرگى كۇنى سەرجان - شىڭجاڭ سانگەرلەر (مودەلدەر) قوعامىنىڭ مۇشەسى. بۇگىندە ول شىڭجاڭداعى ءتۇرلى مودەلدەر باسەكەسىندە قازىلىق جاسايتىن، بىلىكتى مامانعا اينالدى. سونداي-اق، الەۋمەتتىك جەلىدەن جەكە پاراقشا اشىپ، وسى سالاعا بەيىمى بار جاستارعا ۇزدىك مودەل بولۋدىڭ قىر-سىرىن دا ۇيرەتىپ ءجۇر»، - دەپ جازادى CNR.

بايىرعى احلات قالاسىنداعى قازبا جۇمىستارى كەزىندە «وعىزداردىڭ تاڭباسى» تابىلدى - TRT



«تۇرىكتەردىڭ اناتولىعا كىرەر قاقپاسى» دەپ تانىلعان بيتليستىڭ احلات اۋدانىنداعى بايىرعى احلات قالاسىنىڭ ىشكى قامالىندا قازبا جۇمىستارى بارىسىندا «وعىزدىڭ تاڭباسى» تابىلدى، دەپ جازادى تۇركيا راديو تەلەۆيزيا پورتالى.

«جىل سايىن كوپ قوناق كەلەتىن اۋداندا بايىرعى احلات قالاسىنىڭ ىشكى قامالىندا قازبا جۇمىستارى ءجۇرىپ جاتىر. حارابەشەحير اۋماعىنداعى ۇڭگىرلەردەگى جارتاستاردان وعىزدارعا ءتان تاڭبالار انىقتالدى. بايىرعى احلات قالاسىنداعى قازبا جۇمىستارىنىڭ عىلىمي جەتەكشىسى مەحمەت كۋلازدىڭ ايتۋىنشا، قامالدىڭ شىعىس جاعىنداعى كىرەبەرىسىندە ەكى مۇنارا تابىلعان. ولاردىڭ اراسىن جانە ۇستىڭگى بولىگىن زەرتتەۋ كەزىندە وعىزداردىڭ اناتولىعا كەلگەنىن دالەلدەيتىن ەجەلگى ءداۋىر مەكەندەرى مەن ەسكەرتكىشتەر تابىلعان»، - دەپ جازادى TRT.

تارباعاتايدا وتكەن اقىندار ايتىسىنىڭ جۇلدەگەرلەرى انىقتالدى - قىتايدىڭ «ورتالىق حالىق راديوسى» (CNR)



تارباعاتاي ايماعىنىڭ ءدوربىلجىن اۋدانى قىزىلبۇلاق جايلاۋىندا ХХІІ كەزەكتى اقىندار ايتىسى جانە مادەني- تانىمدىق تۋريزم مەرەكەسى ءوتتى، دەپ حابارلايدى قىتايلىق kazakcnr.com سايتى.



اقپارات كوزىنىڭ مالىمەتىنشە، ايماقتىق اقىندار ايتىسى ەكى جىلدا ءبىر رەت وتكىزىلىپ كەلەدى. بيىلعى مادەني شارادا 31 كيىز ءۇي «70» سانىن بىلدىرەتىن فورمادا تىگىلدى. بۇل ق ح ر- دىڭ 70 جىلدىعىنا ورايلاستىرىلىپ وتىر. اتالعان ءىس-شارادا كونسەرت نومىرلەرىمەن قوسا، ات بايگەسى، بالۋاندار كۇرەسى، ۆەلوجارىس سىندى سپورتتىق ويىندار ۇيىمداستىرىلىپ، قازاقتىڭ الۋان ءتۇرلى قولونەر بۇيىمدارىنىڭ كورمە-جارمەڭكەسى ءوتتى.



«ق ح ر- دىڭ تارباعاتاي ايماعىنا قاراستى 6 اۋدان مەن قالالارىنان 20 اقىن قاتىسقان الامان ايتىس ءوز مارەسىنە جەتتى. اقىندار ايتىسىنىڭ باس جۇلدەسىن ءدوربىلجىن اۋدانىنىڭ اقىنى ايىپقان بايموللا ۇلى مەن شاعانتوعاي اۋدانىنىڭ اقىنى گاۋھار نيعىمەت قىزى جەڭىپ الدى. ال تارباعاتاي ايماعىنىڭ كەلەسى اقىندار ايتىسى شاۋەشەك قالاسىندا وتەتىن بولىپ بەلگىلەنىپ، «ايتىس تۋى» قالا اكىمىنە تابىستالدى»، - دەپ جازادى CNR.





وزبەكستاندا شەتەل ازاماتتارى مەن ازاماتتىعى بولماعان ادامدارعا مارتەبە بەرىلەدى - «ءو ز ا» اقپاراتتىق اگەنتتىگى

وزبەكستان رەسپۋبليكاسى مينيسترلەر كابينەتىنىڭ «قۇرمەتتى ازامات» مارتەبەسىن بەرۋ ءتارتىبى تۋرالى قاۋلىسى شىقتى، دەپ حابارلايدى وزبەكستاننىڭ «ءو ز ا» مەملەكەتتىك اقپارات اگەنتتىگى.



«اتالعان قۇجاتقا سايكەس، بۇل مارتەبە ەكونوميكا، عىلىم، مادەنيەت جانە ونەر، ءبىلىم، دەنساۋلىق ساقتاۋ، سونىمەن قاتار الەۋمەتتىك سالانىڭ دامۋىنا ۇلكەن ينۆەستيتسيا سالعان، وزبەكستان رەسپۋبليكاسىندا قايىرىمدىلىقپەن اينالىسىپ جۇرگەن شەتەل ازاماتتارى مەن ازاماتتىعى جوق تۇلعالارعا بەرىلەتىن بولادى. مۇنداي قۇجاتتى سەنات قابىلدايدى، ارنايى كۋالىككە سەنات ءتوراعاسى قول قويىپ تاپسىرادى. ەگەر بۇل باستاماعا مەملەكەتتىك جانە ەكونوميكالىق باسقارۋ ورگاندارى قولداۋ بىلدىرسە، وندا ءارى قاراي شەشىم قاراقالپاقستان رەسپۋبليكاسىنىڭ جوعارعى كەڭەسىندە، حالىق دەپۋتاتتارىنىڭ وبلىستىق جانە تاشكەنت قالالىق كەڭەستەرىندە قابىلدانادى. بۇل مارتەبە وزبەكستان رەسپۋبليكاسىنىڭ ازاماتتىعىن الۋ ءۇشىن نەگىز بولىپ تابىلمايدى»، - دەپ حابارلايدى ءوزا.

قازاق اۋىلىندا بەيجىڭ دەنە شىنىقتىرۋ جانە سپورت ۋنيۆەرسيتەتىنىڭ ورتالىعى اشىلدى



بەيجىڭ دەنە شىنىقتىرۋ جانە سپورت ۋنيۆەرسيتەتى مەن قىتايدىڭ فۋتبول ينستيتۋتى بىرلەسىپ سانجى قالاسىنىڭ اشىلى اۋىلىنداعى مەكتەپتە جاستارعا ءبىلىم بەرەتىن ورتالىقتارىن اشتى، دەپ جازادى قىتايلىق kazakcnr.com سايتى.



اتالعان ب ا ق- تىڭ حابارلاۋىنشا، بۇل بەيجىڭ دەنە شىنىقتىرۋ جانە سپورت ۋنيۆەرسيتەتى مەن قىتاي فۋتبول ينستيتۋتىنىڭ شىڭجاڭداعى اۋىلدىق جەردە اشقان العاشقى ءبىلىم ورتالىعى ەكەن. اتالعان جوعارى وقۋ ورىندارى شىڭجاڭ ولكەسىندە وسىنداي 21 ورتالىق اشۋدى جوسپارلاعان.



«اشىلى قازاق ۇلتتىق اۋىلىنداعى بۇل ورتالىققا بەيجىڭدەگى جوعارى وقۋ ورنى بىلىكتى ماماندارىن جىبەرىپ وتىرادى. ولار اۋىلدا تۇراتىن فۋتبولعا بەيىمى بار تالانتتى بالالاردى ىرىكتەپ الىپ، ولارعا ساپالى ءبىلىم بەرۋدى كوزدەپ وتىر. ماماندار دەنە شىنىقتىرۋ ساباقتارىمەن قوسا، اعىلشىن ءتىلىن، باسقا دا ءتۇرلى پاندەردى وقىتپاق. ۇزدىكتەر مەكتەپ بىتىرگەننەن كەيىن بىردەن جوعارى وقۋ ورنىنا قابىلدانادى. وسى ارقىلى بەيجىڭ دەنە شىنىقتىرۋ جانە سپورت ۋنيۆەرسيتەتى مەن قىتاي فۋتبول ينستيتۋتى بولاشاق ستۋدەنتتەرىن مەكتەپ قابىرعاسىنان تاربيەلەپ، ساپالى تۇلەكتەردى دايارلاپ شىعۋعا نيەتتەنىپ وتىر. وسىلايشا اتالعان وقۋ ورىندارى ەل نامىسىن قورعايتىن كەلەشەك فۋتبول جۇلدىزدارىن تالانتتى اۋىل بالالارىنىڭ اراسىنان ىزدەپ ءجۇر»، - دەپ جازادى kazakcnr.com سايتى.



قازاقستاندا تاعى ءبىر ۇلكەن مۇناي وڭدەۋ زاۋىتىنىڭ قۇرىلىسى باستالدى - «فارس» اقپارات اگەنتتىگى

قازاقستاننىڭ باتىس قازاقستان وبلىسىندا تاعى ءبىر ۇلكەن مۇناي وڭدەۋ زاۋىتىنىڭ قۇرىلىسى باستالدى، دەپ جازادى parstoday اقپارات اگەنتتىگى.

Fars اقپارات اگەنتتىگىنىڭ حابارلاۋىنشا، بۇل زاۋىتتى سالۋ قۇنى 420 ميلليون دوللار دەپ ەسەپتەلگەن. زاۋىتتى سالۋعا قازاقستان ۇكىمەتى تاراپىنان 59,8 گەكتار جەر بولىنگەن. كاسىپورىندا اۆتوموبيل بەنزينى، ديزەل وتىنى، كەروسين جانە بيتۋم وندىرىلەدى.



زاۋىت 2021-جىلى ىسكە قوسىلادى دەپ جوسپارلانۋدا. زاۋىتتى سالۋ ءۇشىن 500 جۇمىس ورنى، ال زاۋىت جۇمىس ىستەي باستاعان سوڭ 200 جۇمىس ورنى اشىلادى.

سونداي-اق، مۇناي وڭدەۋ زاۋىتى جىلىنا 750 مىڭ توننا مۇناي ونىمدەرىن، سونىڭ ىشىندە بەنزين، ديزەل مەن وتىننىڭ باسقا تۇرلەرىن وندىرەتىن بولادى.

جوسپار بويىنشا، بۇل زاۋىت ونىمدەرىنىڭ 80 پايىزى ەل ىشىندە، 20 پايىزى تمد ەلدەرىنە ەكسپورتتالادى.

اۆتور: باقىتجول كاكەش


:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
بەيسەن سۇلتان
بەيسەن سۇلتان
954-049
رەداكتور
كۇنسۇلتان وتارباي
كۇنسۇلتان وتارباي
954-049

مۇراعات