يليا يلين قازاقستان سپارتاكياداسىندا جەڭىسكە جەتتى

تالدىقورعان. قازاقپارات - تالدىقورعاندا اۋىر اتلەتيكادان وتكەن قازاقستان سپارتاكياداسىندا يليا يلين جەڭىسكە جەتتى.

ءتورت دۇركىن الەم چەمپيونى 102 كەلىگە دەيىنگى سالماقتا ونەر كورسەتتى، دەپ حابارلايدى قازاقپارات ءتىلشىسى.

سپورتشى «جۇلقا كوتەرۋدە» 170 كەلىنى ەڭسەرىپ، قارسىلاستارىنان وق بويى وزىق تۇردى.

«سەرپە كوتەرۋدە» يليان يلين 200 كەلى سالماقتى ءبىرىنشى مۇمكىندىگىندە كوتەرە الماي، ەكىنشى تالپىنىسىندا باعىندىردى. ال ءۇشىنشى مۇمكىندىگىندە 205 كەلىگە تاپسىرىس بەرىپ، وكىنىشكە وراي زىلتەمىرگە شاماسى جەتپەدى. قوس سايىستىڭ قورىتىندىسى بويىنشا يليا يلين 370 كەلىنى (170 كەلى جۇلقا كوتەرۋ-200 كەلى سەرپە كوتەرۋ) كوتەرىپ، سپارتاكيادانىڭ جەڭىمپازى اتاندى.

وسى باسەكە كەزىندە يليا يلين بۇعان دەيىنگى جارىستاردا كورسەتكەن ناتيجەسىنەن جوعارى كورسەتكىشكە قول جەتكىزدى.

ايتا كەتەيىك، تالدىقورعاندا 4-9 -تامىز ارالىعىندا قازاقستاننىڭ اۋىر اتلەتيكادان سپارتاكياداسى ءوتتى. جارىس بۇگىن مارەسىنە جەتتى.

اۆتور: سامال قابىشەۆا