مينيستر وقۋلىق ساراپشىلارى قالاي ىرىكتەلۋ كەرەكتىگىن ايتتى

نۇر-سۇلتان. قازاقپارات – ق ر ءبىلىم جانە عىلىم ءمينيسترى اسحات ايماعامبەتوۆ وقۋلىق اۆتورلارى مەن ساراپشىلارى ارنايى كۋرستان وتەتىنىن ءمالىم ەتتى، دەپ حابارلايدى قازاقپارات ءتىلشىسى.

«جاقسى مۇعالىمنىڭ ءبارى وقۋلىق جازا المايدى. ونىڭ ءوز زاڭدىلىقتارى مەن تالاپتارى بار. وقۋلىق جازۋ مەن مونوگرافيا جازۋ ەكى بولەك دۇنيە. وسىنى ەسكەرمەگەندىكتەن، ءبىزدىڭ بالالارعا ۇسىناتىن وقۋلىقتارىمىز مونوگرافيا سياقتى بولىپ كەتىپ ءجۇر. ونداي وقۋلىقتى بالانىڭ ءتۇسىنۋى قيىن. سوندىقتان، وقۋلىق اۆتورلارىنىڭ ءوزىن وقىتۋ كەرەك»، - دەدى اسحات ايماعامبەتوۆ.

اۋەلى وقۋلىق ساپاسىن ساراپتايتىن ماماندار وقىتىلاتىن بولادى. سول ءۇشىن ەلدەگى 1000 ۇزدىك مۇعالىم ىرىكتەلىپ، ارنايى كۋرستان وتەدى.

«جىل سايىن ارنايى كۋرستان وتكەن ساراپشىلاردىڭ ىشىنەن ۇزدىكتەرى جاسىرىن ءادىس ارقىلى تاڭداپ الىنادى. وسىدان كەيىن وقۋلىق اۆتورلارىن وقىتامىز. بىزدە اۆتورلار كوپ ەمەس، سوندا دا وقىتامىز»، - دەدى ۆدەومستۆو باسشىسى.

اسحات ايماعامبەتوۆ وقۋلىقتى ساراپتاۋ جۇيەسى قالاي جۇمىس ىستەيتىنىن ءتۇسىندىردى.

«ساراپشىلار وقۋلىقتى باعالاۋ ءۇشىن باس قالاعا ەكى رەت كەلەدى. ءار كەلگەندە ءبىر اپتا عانا ۋاقىت بەرىلەدى. ولارعا ۇلكەن وقۋلىق ۇستاتادى. ەلوردادا وتىرىپ، ءبىر اپتانىڭ ىشىندە ونى ساراپتاپ شىعۋ مۇمكىن ەمەس. وقۋلىقتى تولىق ساراپتاۋ ءۇشىن سۋرەتتەرىن، كارتالاردى، كەستەلەردى، ەسەپتەر مەن ونىڭ شەشۋ جولدارىن، جالپى مازمۇنى مەن پۋنكتۋاتسياسىن تەكسەرىپ شىعۋ كەرەك. وسىنىڭ ءبارىن ءبىر اپتادا تىندىرۋ قانشالىقتى مۇمكىن؟ مۇنداي جۇيە بىزگە ۇنامايدى. ساراپشىلار وقۋلىق سىناقتان وتپەي تۇرىپ ماكەتىمەن تانىسۋى كەرەك. ول ءۇشىن ارنايى ەلەكتروندى پلاتفورما قۇرىلادى. سول ارقىلى اقپارات الماسىپ، جۇيەلى نەگىزدە جۇمىس ىستەيتىن بولامىز»، - دەدى مينيستر.

اۆتور: ەسىمجان ناقتىباي