اتامبايەۆتى تۇتقىنداۋ: جەەنبەكوۆ قاۋىپسىزدىك كەڭەسىن جيناماقشى

نۇر-سۇلتان. قازاقپارات - سەگىزىنشى تامىزدا تۇسكە دەيىن قىرعىزستاننىڭ قاۋىپسىزدىك كەڭەسىنىڭ وتىرىسى بولىپ وتپەك.

مەملەكەت باسشىسى سوورونباي جەەنبەكوۆ بۇل شەشىمدى قوي-تاشتا ورىن العان وقيعالارعا بايلانىستى قابىلداعان دەپ جازادى 24.kg اگەنتتىگى.

جەەنبەكوۆتىڭ توراعالىعىمەن قاۋىپسىزدىك كەڭەسىنىڭ وتىرىسى جوسپارلانىپ جاتقانى جونىندە پرەزيدەنت اكىمشىلىگىنىڭ اقپاراتتىق ساياسات ءبولىمى حابارلادى.

وعان قوسا، پارلامەنت دەپۋتاتى داستان بەكەشيەۆ جوگوركۋ كەنەشتىڭ كەزەكتەن تىس شاقىرتىلۋىنا قول جينالىپ جاتقانىن جەتكىزدى.

«كەزەكتەن تىس وتىرىستى ۇيىمداستىرۋ ءۇشىن 40 ادامنىڭ قولى كەرەك. جينالىپ جاتقان سياقتى. تاڭەرتەن سانايتىن بولامىز. شىندىعىندا، بۇل ۇردىسكە ارالاسۋ مۇمكىن. تۇك شىقپاي قالۋ دا مۇمكىن»، - دەپ جازدى ول Twitter پاراقشاسىنا.

ايتا كەتەيىك، مەملەكەت باسشىسى ءوزىنىڭ قىسقامەرزىمدى دەمالىسىن ءۇزىپ، بىشكەككە كەلۋگە ءماجبۇر بولدى.

قازىرگى تاڭدا، قۇقىق قورعاۋ قىزمەتكەرلەرى المازبەك اتامبايەۆتى تۇتقىنداۋ ءۇشىن ونىڭ ۇيىنە ەكىنشى شابۋىل جاساۋدى ويلاستىرىپ جاتىر. ەكس-پرەزيدەنتتى قوي-تاشقا وزگە وڭىرلەردەن كەلىپ جاتقان جاقتاستارى قورعاپ جاتىر.