پاۆلوداردان شاعىم كوپ كەلەدى. مينيستر تۇرعىمبايەۆ دەپارتامەنت باسشىسىنا سالەم جولدادى

نۇر-سۇلتان. قازاقپارات – ق ر ىشكى ىستەر ءمينيسترى ەرلان تۇرعىمبايەۆ Nur Otan پارتياسىندا ازاماتتاردى قابىلداۋ بارىسىندا پاۆلودار وبلىسىنىڭ پوليتسيا دەپارتامەنتىنىڭ جۇمىسىن سىنعا الدى، دەپ حابارلايدى قازاقپارات ءتىلشىسى.

ۇيدەگى گاز باللونىنىڭ جارىلىسى كەزىندە اناسىنان ايىرىلعان پاۆلودارلىق نايليان يماشەۆا ادام ءومىرىن جالماعان جارىلىستىڭ ءمان-جايىنا پوليتسيا قىزمەتكەرلەرىنىڭ سالعىرت قاراپ وتىرعانى تۋرالى ايتىپ شاعىمداندى. ونىڭ ايتۋىنشا، اتالمىش وقيعاعا قاتىستى كىسى ءولىمى بويىنشا ەمەس، بوتەننىڭ مۇلكىن زاقىمداۋ فاكتىسى بويىنشا تەرگەۋ جۇرگىزىلگەن.

«2018 -جىلدىڭ جەلتوقسانىندا ءبىزدىڭ ۇيدە گاز باللونى جارىلعان بولاتىن. ءبىز باللوندى جانارماي بەكەتىنەن تولتىرىپ اكەلگەنبىز. قولدانىپ تا ۇلگەرمەدىك. كەنەت ول جارىلدى. جارىلىس سوڭى ورتكە ۇلاسىپ، انامنىڭ دەنەسىنىڭ 95 پايىزىن، اكەمدى 73 پايىز، ءوزىمدى 73 پايىز، قىزىمدى 60 پايىز كۇيىك شالدى. ءبارىمىز جانساقتاۋ بولىمىنە تۇستىك. ءۇشىنشى كۇنى انام ومىردەن ءوتتى. وسى وقيعا قاتىستى «بوتەننىڭ مۇلكىن جويۋ جانە ءبۇلدىرۋ» دەگەن 204-باپ بويىنشا قىلمىستىق ءىس قوزعالدى»، - دەدى تۇرعىن.

ونىڭ سوزىنە قاراعاندا، قوزعالىپ جاتقان ىسكە كۇيىك شالىپ قايتىس بولعان اكە-شەشەسى كىرمەي قالعان.

«ىستە قازا بولعان اكەم مەن انام جوق. كىنالى دە، جوق، باپ تا جوق. پوليتسيا قىزمەتكەرلەرى ەكىباستۇز قالاسىنا سۇراۋ سالعانىن، ولاردىڭ قاراۋىندا 120 قۇجات جاتقانىن، ونىڭ بارلىعىن جاتقا ءبىلۋ مۇمكىن ەمەس ەكەنىن ايتتى. كەيىن ءبىزدى پوليتسيا باسشىسى شاقىرىپ، ءىس ازاماتتىق سوتقا بەرىلەدى دەدى»، - دەپ شاعىمداندى ول.

مينيستر ەرلان تۇرعىمبايەۆ ءوتىنىش بىلدىرگەندەردى تىڭداپ، ءىستى تەكسەرىپ، تىركەۋدى تاپسىردى.

«ىشكى ىستەر مينيسترلىگىنىڭ تەرگەۋ دەپارتامەنتىنە باراسىز. بىزدە بارلىق ءىس تەكسەرىلىپ، تىركەلەدى. وقيعا ورنىنا دا ادامدار جىبەرىپ، تەكسەرۋ قاجەت. ءورت-تەحنيكالىق ساراپتامانى قايتا كوتەرۋ كەرەك. قاتىسى بار ادامدار جاۋاپقا تارتىلادى. بۇل ىستە ەشقانداي قيىندىق جوق. تەك كۇتىڭىز»، - دەدى مينيستر.

سونداي-اق، ول كىنالى قىزمەتكەرلەرگە قارسى «قىزمەتىنەن بوساتۋعا دەيىن» جازا قولدانۋ تۋرالى تۋرالى بۇيرىق دايىنداۋدى تاپسىردى.

«پاۆلودار، بايلانىستا بارسىزدار ما؟ دەپارتامەنت باسشىسى ەڭبەك دەمالىسىنان قاشان شىعادى؟ وعان دۇعاي سالەم ايتىڭىزدار. وسى وقيعا بويىنشا ارنايى تەكسەرۋ جىبەرەمىن. قىزمەتتەن بوساتۋعا دەيىن جازا قولدانۋ تۋرالى بۇيرىق دايىنداڭىزدار. ەكى ادام قازا تاۋىپ، ەكى ادامدى كۇيىك شالعان. وعان ەشكىم كىنالى بولماعانى ما؟ جالپى پاۆلودار بويىنشا جۇمىستارىڭىزعا ريزا ەمەسپىن. شاعىمدانۋشىلار كوپ كەلەدى. ەشقانداي رەاكسيا جوق. زاڭسىزدىق جايلاپ العان ول جاقتى. بارلىق فاكتىلەر بويىنشا تەكسەرۋ جىبەرەمىن»، - دەدى مينيستر.

ەسكە سالساق، بۇگىن ق ر ىشكى ىستەر ءمينيسترى ەرلان تۇرعىمبايەۆ Nur Otan پارتياسىندا ازاماتتاردى جەكە ماسەلەلەرى بويىنشا قابىلدادى.

اۆتور: ەسىمجان ناقتىباي