توقايەۆ ەكس-مينيستر مەن بىرنەشە لاۋازىمدى قىزمەتكەردى قاتاڭ جازالادى

نۇر-سۇلتان. قازاقپارات – ق ر پرەزيدەنتى وكىمىمەن ارىستاعى جارىلىسقا جول بەرگەن بۇرىنعى قورعانىس ءمينيسترى قارۋلى كۇشتەر قۇرامىنان شىعارىلىپ، ءۇش جوعارى اسكەري لاۋازىمدى تۇلعاعا قاتاڭ سوگىس جاريالاندى، دەپ حابارلايدى قازاقپارات اقورداعا سىلتەمە جاساپ.

مەملەكەت باسشىسىنىڭ وكىمىمەن وزىنە جۇكتەلگەن مىندەتتەردى ءتيىستى دەڭگەيدە ورىنداماعانى جانە قارۋ-جاراق پەن وق-دارىلەردىڭ قاۋىپسىزدىگىن جانە ساقتالۋىن قامتاماسىز ەتۋ جۇمىسىنداعى، قارۋ-جاراق پەن وق-دارىلەردى ساقتاۋ وبەكتىلەرىن كوشىرۋ جانە ورنالاستىرۋ باعدارلاماسىن ىسكە اسىرۋ كەزىندەگى ەلەۋلى كەمشىلىكتەرى، سونىڭ سالدارىنان ارىس قالاسىندا ورنالاسقان اسكەري بولىمشەدەگى قارۋ-جاراقتىڭ جارىلۋىنا جانە قالادا ادام شىعىنىنا ۇشىراتقان اۋقىمدى اپاتقا جول بەرگەنى ءۇشىن:

1. قازاقستان رەسپۋبليكاسى قورعانىس ءمينيسترى بولىپ قىزمەت اتقارعان ساكەن ءادىلحان ۇلى جاسۇزاقوۆ قازاقستان رەسپۋبليكاسىنىڭ قارۋلى كۇشتەرى جۇيەسىنەن شىعارىلدى.

2. كەلەسى لاۋازىمدى قىزمەتكەرلەرگە:

قازاقستان رەسپۋبليكاسى قورعانىس ءمينيسترىنىڭ ءبىرىنشى

ورىنباسارى - قازاقستان رەسپۋبليكاسى قارۋلى كۇشتەرى باس شتابىنىڭ باستىعى مۇرات كارىباي ۇلى بەكتانوۆقا؛

قازاقستان رەسپۋبليكاسى قورعانىس ءمينيسترىنىڭ ءبىرىنشى

ورىنباسارى - قازاقستان رەسپۋبليكاسى قارۋلى كۇشتەرى باس شتابىنىڭ باستىعى بولىپ قىزمەت اتقارعان مۇرات جالەل ۇلى مايكەيەۆكە؛

قازاقستان رەسپۋبليكاسى قورعانىس ءمينيسترىنىڭ ورىنباسارى بولىپ قىزمەت اتقارعان تالعات جەڭىس ۇلى جانجۇمەنوۆكە قاتاڭ سوگىس جاريالاندى.

ەسكە سالا كەتسەك، ارىس قالاسىنداعى اسكەري ءبولىمنىڭ قويماسىندا 24 -ماۋسىم كۇنى تاڭەرتەڭ جارىلىس بولدى. سالدارىنان ءۇش ادام قازا تاپتى - ارىس تۇرعىنى مەن ەكى اسكەري قىزمەتشى. 170 كە جۋىق ادام زارداپ شەكتى. 20 عا جۋىق ءۇي، 9 قورا-قوپسى جانىپ كەتتى. ءۇي-جايلار مەن عيماراتتاردىڭ 80-90 پايىزىنا ءارتۇرلى دەڭگەيدە زاقىم كەلدى.

تۇركىستان وبلىسىنا ارنايى بارعان قازاقستان پرەزيدەنتى قاسىم-جومارت توقايەۆ ارىستاعى اسكەري بولىمشەدەگى وق-ءدارى قويماسىنداعى جارىلىستان زارداپ شەككەن قالا تۇرعىندارىمەن كەزدەسىپ، قالانىڭ قالپىنا كەلتىرىلەتىنىنە ۋادە بەردى.