ديپلوممەن اۋىلعا: جاس ماماننىڭ اۋىلدا جۇمىس ىستەۋ مەرزىمى نەلىكتەن قىسقارتىلدى

نۇر-سۇلتان. قازاقپارات - ۇلتتىق ەكونوميكا ۆيتسە-ءمينيسترى ەرمەك الپىسوۆ «ديپلوممەن اۋىلعا» باعدارلاماسى بويىنشا مەملەكەتتەن الەۋمەتتىك قولداۋ العان جاس ماماننىڭ مىندەتتى جۇمىس ىستەۋ مەرزىمى 5 جىلدان 3 جىلعا نەلىكتەن قىسقارتىلعانىن ءتۇسىندىردى، دەپ حابارلايدى قازاقپارات ءتىلشىسى.

«مامانداردىڭ مىندەتتەرىن ورىنداۋ مەرزىمى، ياعني اۋىلدا جۇمىس ىستەۋ بويىنشا مىندەتتى مەرزىمى 5 جىلدان 3 جىلعا قىسقارتىلدى»، - دەدى ۇلتتىق ەكونوميكا ۆيتسە- ءمينيسترى ەرمەك الپىسوۆ ۇكىمەتتىڭ باسپا ءسوز ورتالىعىندا.

3 جىلدىق مەرزىم جاس ماماننىڭ اۋىلدا ورنىعۋىنا جەتە مە؟ بۇل سۇراققا ۆيتسە-مينيستر بىلايشا جاۋاپ بەردى.

«اۋىلدا تۇرۋ مەرزىمى نەلىكتەن قىسقارتىلدى؟ بۇل وزگەرىستىڭ ەنگەنىنە ءبىرشاما ۋاقىت بولىپ قالدى. باعدارلاماعا قاتىسۋشىلاردىڭ تالاپ-تىلەگىنە جانە جەرگىلىكتى اتقارۋشى ورگانداردىڭ سۇرانىسىنا قارادىق. ءبىز ءاربىر ادامنىڭ كونستيتۋتسيالىق قۇقىعىن شەكتەي المايمىز. ءار جاس ماماننىڭ ءوزىنىڭ ءومىرى، وتباسىلىق جاعدايى بولۋى مۇمكىن. سول سەبەپتى، ۇكىمەتتىڭ قاۋلىسىمەن بىرنەشە جىل بۇرىن مەرزىمدى 5 جىلدان 3 جىلعا قىسقارتۋ تۋرالى شەشىم شىققان ەدى. ەگەر ايماقتار جاس مامانداردىڭ مىندەتتى جۇمىس ىستەۋ مەرزىمىن ۇزارتۋ تۋرالى ۇسىنىس بىلدىرسە - مارحابات، قاراستىرۋعا دايىنبىز»، - دەدى ەرمەك الپىسوۆ.

ەسكە سالا كەتسەك، ەرمەك الپىسوۆ بۇعان دەيىن «ديپلوممەن اۋىلعا» باعدارلاماسى بويىنشا 5 172 مامانعا ءبىر رەتتىك كوتەرمە جاردەماقى بەرىلگەنىن حابارلاعان بولاتىن.

اۆتور: ايان بەكەن ۇلى