قىتاي كوسەمىنە سىيعا تارتىلعان سول قوبىز قازىر قايدا ەكەن؟

نۇر-سۇلتان. قازاقپارات - جۋىردا الەۋمەتتىك جەلىنىڭ ءبىرىن شارلاپ وتىرىپ، مىنانداي دەرەكتى كەزدەستىردىك:

قۇرمانعازى اتىنداعى ۇلت اسپاپتار وركەسترى 1957 -جىلى قىتايدا كونسەرت قويعاندا قىتاي حالىق رەسپۋبليكاسىنىڭ ءتوراعاسى ماۋ زىدۋڭگە وركەستر جەتەكشىسى، ديريجەر شامعون قاجىعاليەۆ قازاقستان ۇكىمەتى اتىنان شەبەر قامار قاسىموۆ جاساعان قوبىزدى سىيعا تارتقان ەكەن.

ءبىزدى وسى سىيلىقتىڭ كەيىنگى تاعدىرى قىزىقتىردى. سول ەلدەن كوشىپ كەلگەن ارىپتەسىمىزدەن مۇنىڭ جايىن سۇراعان ەدىك، بىلمەيتىن بولىپ شىقتى. ءبىراق وتكەن عاسىردىڭ الپىسىنشى جىلدارى قىتايدا بولعان مادەني توڭكەرىس كەزىندە بۇل قوبىزدى قۇرتىپ جىبەردى مە دەگەن بولجام ايتتى.

ءبىر اتاپ وتەرلىگى، قامار قاسىموۆ - ءتۇرلى حالىقارالىق دەڭگەيدەگى كورمەلەرگە قاتىسقان قازاقتىڭ تۇڭعىش قولونەر شەبەرلەرىنىڭ ءبىرى. كەزىندە سۋرەتشىلەر وداعىنىڭ مۇشەسى دە اتانعان. ول ورنەكتەپ جاساعان اسەم مۋزىكالىق اسپاپتار بۇگىندە ماسكەۋ، سانكت-پەتەربۋرگ، الماتى، سەمەي مۇراجايلارىندا ساقتاۋلى تۇر.

شەبەردىڭ ەڭبەگى ەلەنىپ، قاز ك س ر-دىڭ ەڭبەك سىڭىرگەن ونەر قايراتكەرى اتاعىنا يە بولدى. «ەڭبەك قىزىل تۋ» وردەنىمەن جانە كوپتەگەن مەدالدارمەن ماراپاتتالدى. شەتەل عالىمدارى ونى «قازاقتىڭ ستراديۆاريى» اتاعان. قامار جاساعان، قىتاي باسشىسىنا سىيعا تارتىلعان سول قوبىز قازىر قايدا ەكەن؟

دەرەككوز astana-akshamy.kz