زەينەتاقى جيناعىن يپوتەكاعا جۇمساۋعا مۇمكىندىك بەرگەلى جاتىر

نۇر-سۇلتان. قازاقپارات - قىرعىزستاندا الەۋمەتتىك قور قىرعىزستاندىقتارعا مەملەكەتتىك جيناقتاۋشى زەينەتاقى قورىنا تولەنگەن قاراجاتتى باستاپقى يپوتەكالىق جارناعا جانە اۋىر دەرتى بولعان جاعدايدا شىعىنداردى جابۋعا جۇمساۋعا رۇقسات بەرۋدى ۇسىندى.

ءتيىستى قاۋلى جوباسىن ۆەدومستۆو قوعامدىق تالقىلاۋعا شىعاردى. بۇل تۋرالى 24.kg حابارلادى.

بۇل قاۋلىدا تۇرعىن ءۇي ساتىپ الۋعا قاراجاتتى مەملەكەتتىك يپوتەكالىق باعدارلاماعا قاتىسۋ كەزىندە عانا جۇمساۋعا بولاتىنى ايتىلادى، ال دەرتكە ۇشىراعاندار ۇكىمەت بەلگىلەگەن تىزىمدە بولۋى ءتيىس ەكەن.

مەملەكەتتىك مۇراعاتتىڭ مالىمەتتەرى بويىنشا، باستاپقى جارنا ورتا ەسەپپەن - 50 مىڭ سوم. سوندىقتان زەينەتاقى جيناقتارى وسى شەكتەن اساتىن ادامدارعا تولەم جاساۋ قۇقىعىن بەرۋ ۇسىنىلادى.

سونىمەن قاتار، ساقتاندىرىلعان تۇلعا قولما-قول اقشا الا المايدى، قاراجات بەلگىلى ءبىر بانك شوتتارىنا اۋدارىلادى. ۆەدومستۆوداعىلار بۇل ولاردىڭ ۇتىمسىز جۇمسالۋىن بولدىرماۋعا مۇمكىندىك بەرەدى دەپ ەسەپتەيدى.

الەۋمەتتىك قوردا ومىرگە ەلەۋلى قاۋىپ توندىرەتىن جانە قىمبات ەمدەۋدى قاجەت ەتەتىن اۋىر دەرت جاعدايىندا تولەم مەحانيزمى قاراستىرىلعان.

ول ءۇشىن ەلدىڭ دەنساۋلىق ساقتاۋ مينيسترلىگىمەن بىرلەسىپ تولەمدەر الۋ ءۇشىن اۋرۋلار تىزبەسىن انىقتايدى. سونىمەن قاتار، سىبايلاس جەمقورلىقتىڭ الدىن الۋ ءۇشىن وسىنداي اۋرۋدىڭ بولۋى تۋرالى انىقتاما جوباسى ازىرلەنىپتى.

ۆەدومستۆوداعىلار ۇسىنىلىپ وتىرعان شارالار ازاماتتاردى قاراجات جيناقتاۋعا ىنتالاندىرادى دەپ سانايدى.

ايتا كەتەيىك، قىرعىزستاننىڭ زەينەتاقى جۇيەسىنە مىندەتتى جيناقتاۋشى ەلەمەنت 2010-جىلى ەنگىزىلگەن. جيناقتاۋشى بولىگى زەينەتاقى ەسەبىنەن قالىپتاسادى جانە مىندەتتى الەۋمەتتىك ساقتاندىرۋ جارنالارىن تولەنگەن ءارى ساقتاندىرىلعان تۇلعا مەملەكەتتىك جيناقتاۋشى زەينەتاقى قورى (م ج ز ق) 2 پايىز مولشەرىندە ەسەپتەلگەن تابىس بەلگىلەنەدى.

Kaz.tengrinews.kz