ەلوردادا «بەرەكەلى باسپانا» باعدارلاماسى بويىنشا قۇجات قابىلداۋ باستالدى

نۇر-سۇلتان. قازاقپارات - «تۇرعىن ءۇي قورى» كوممۋنالدىق مەملەكەتتىك مەكەمەسى «بەرەكەلى باسپانا» باعدارلاماسى بويىنشا قۇجاتتاردى قابىلداۋدى باستادى، دەپ حابارلايدى قازاقپارات ەلوردا ينفو سايتىنا سىلتەمە جاساپ.

باعدارلاماعا «الەۋمەتتىك جاعىنان وسال» ساناتى بويىنشا كەزەكتە تۇرعان ازاماتتار قاتىسادى. ولارعا ۇلى وتان سوعىسىنىڭ مۇگەدەكتەرى مەن قاتىسۋشىلارىنا تەڭەستىرىلگەن ادامدار، مۇگەدەك بالالارى بار نەمەسە ولاردى تاربيەلەۋشى وتباسىلارى، كەيبىر سوزىلمالى اۋرۋلاردىڭ اۋىر تۇرلەرىمەن اۋىراتىن ادامدار، جاسىنا قاراي زەينەت دەمالىسىنا شىققان زەينەتكەرلەر، جەتىم بالالار نەمەسە اتا-اناسىنىڭ قاراۋىنسىز قالعان ازاماتتار، تولىق ەمەس وتباسىلار، 1- جانە 2-توپتاعى مۇگەدەكتەر، ورالماندار، ەكولوگيالىق زىلزالالار، تابيعي جانە تەحنوگەندى سيپاتتاعى توتەنشە جاعدايلار سالدارىنان باسپاناسىنان ايىرىلعاندار، مەملەكەتتىك نەمەسە قوعامدىق مىندەتتەرىن، اسكەري قىزمەتىن ورىنداۋ كەزىندە، عارىش كەڭىستىگىنە ۇشۋدى دايىنداۋ نەمەسە جۇزەگە اسىرۋ كەزىندە، ادام ءومىرىن قۇتقارۋ كەزىندە، قۇقىق ءتارتىبىن قورعاۋ كەزىندە قازا تاپقان (قايتىس بولعان) ادامداردىڭ وتباسىلارى جاتادى.

پاتەرلەر جەكەشەلەندىرۋ قۇقىعىنسىز، جالدامالى نەگىزدە بەرىلەدى. باستاپقى جارنا ەنگىزۋدىڭ قاجەتى جوق. ءبىر جانە ەكى بولمەلى بارلىعى 148 باسپانا ۇلەستىرىلەدى.

قۇجاتتاردى قابىلداۋ 6-12- تامىز ارالىعىندا جۇرگىزىلەدى.

تالاپتار - تۇرعىن ءۇي قورىنان باسپاناعا مۇقتاجدار تىزىمىندە «الەۋمەتتىك جاعىنان وسال توپتار» ساناتىندا تىركەلگەن بولۋ.

قۇجاتتاردى قابىلداۋدى «تۇرعىن ءۇي قورى» ك م م ر. قوشقاربايەۆ داڭعىلى، 39 (قوشقاربايەۆ-جۇمابايەۆ قيىلىسى، «بارىس» ت ك ايالداماسى) مەكەنجايى بويىنشا ىسكە اسىرادى.