ەلوردالىق مۇگەدەك قولاربادا بيلەۋدەن حالىقارالىق تۋرنيردىڭ كۇمىس جۇلدەگەرى اتاندى
كۇمىس مەدالمەن قاتار استانالىق ءبيشى ارداق وتوربايەۆ الەم چەمپيوناتىندا ەل نامىسىن قورعاۋعا جولداما الدى، دەپ حابارلايدى قازاقپارات.
«فينليانديانىڭ تامپەر قالاسىندا قولاربامەن بيلەۋدەن حالىقارالىق ليتسەنزيالىق تۋرنير اياقتالدى. جارىس 1-5- تامىز ارالىعىندا ءوتتى، وعان الەمنىڭ 12 ەلىنەن كاسىبي ءبيشى سپورتشىلار قاتىستى»، - دەدى استانالىق مۇگەدەك جاندارعا ارنالعان سپورت مەكتەبىنىڭ باسپا ءسوز حاتشىسى كارينا دۇيسەنوۆا.
ونىڭ ايتۋىنشا، اتالعان تۋرنيردە ەلوردالىق سپورتشى، حالىقارالىق دارەجەدەگى سپورت شەبەرى ارداق وتوربايەۆ جەكە ونەر كورسەتۋدە كۇمىس جۇلدەگە يە بولدى.
سونىمەن قاتار، ول وسى جىلى وتەتىن الەم چەمپيوناتىنىڭ ليتسەنزياسىن ۇتىپ الدى.
«ساناۋلى كۇننەن سوڭ الەم چەمپيوناتىنا قىزۋ دايىندىقتى باستايمىز. ارداق تۋرنير قاتىسۋشىلارى اراسىندا ءوزىن جوعارى دەيگەيدە كورسەتە ءبىلدى. ەندىگى ماقسات - الەم چەمپيوناتىندا ۇزدىك ناتيجە كورسەتۋ. ول ۇستىمىزدەگى جىلدىڭ قىركۇيەك ايىندا رەسەيدىڭ سانكت-پەتەربۋرگ قالاسىندا وتەدى»، - دەيدى ق ر ەڭبەك سىڭىرگەن سپورتشىسى، ءارى جاتتىقتىرۋشى ءاليا تۇسىپبەكوۆا.