قاجىلىق ساپاردى ۇيىمداستىراتىن كومپانيالارعا تالاپ كۇشەيتىلەدى

None
None
نۇر-سۇلتان. قازاقپارات - قازاقستاندىقتاردىڭ قاجىلىق ساپارى ارنايى ميسسيانىڭ باقىلاۋىندا، دەپ حابارلايدى قازاقپارات.

«مەككە قالاسىندا ءوز جۇمىسىمىزدى ەڭ الدىمەن قوناقۇيلەرگە تەكسەرىس جۇرگىزۋدەن باستادىق. بۇل رەتتە كومپانيالارعا قويىلعان باستى تالاپ - پارىزىن وتەۋگە كەلگەندەرگە قولايلى جاعداي جاساۋ. ياعني ەلدە بەرگەن ۋادەسىنە ساي ساپالى قىزمەت كورسەتۋ. ناقتى قويىلعان تالاپتاردىڭ ءبىرى ول - قاجىلارىمىز توقتاعان قوناقۇيلەردە ەلدىگىمىزدى بىلدىرەتىن نىشانداردىڭ، ياعني رامىزدەردىڭ بولۋى. سونداي-اق، قاجىلارعا باعىت-باعدار بەرۋشى انىقتامالىقتاردىڭ بار- جوعى دا ەسەپكە الىنادى. وعان قوسا فيرما ۇسىنعان باعدارلامادا ناماز كەستەسى، تاماقتانۋ ۋاقىتى، اس ءمازىرى بولۋى قاجەت. تاعام ساپاسى مەن باعاسىنىڭ ساي بولۋى دا نازاردان تىس قالمايدى»، - دەيدى قازاقستان قاجىلىق ميسسياسىنىڭ ءتوراعاسى الاۋ ادىلبايەۆ.


ونىڭ ايتۋىنشا قاجىلىق بارىسىندا كورسەتىلگەن قىزمەت تۇرلەرى ميسسيانىڭ ءجىتى باقىلاۋىندا.


«سونىمەن قاتار، ميسسيالىق قىزمەت بولمەلەردەگى دارەتحانادان باستاپ، قاجىلاردىڭ ورنالاسۋ جاعدايى مەن گيگيەنالىق زاتتارمەن قامتىلۋ بارىسىن ءجىتى تەكسەردى. ودان بولەك، دارىگەردىڭ بولۋى مەن ساپالى قىزمەت كورسەتەتىن گيدتىڭ سانى دا ماڭىزدى. سانمەن قوسا ولاردىڭ ءدىني ساۋاتىنىڭ بولۋى دا ەسكەرىلەدى. تاعى ءبىر ايتىپ وتەتىن جايت، قاسيەتتى مەكەنگە كەلۋشىلەرگە بەرىلەتىن زاتتار مەن كيىمنىڭ بىركەلكىلىگى جانە ق م د ب بەكىتكەن ۋاعىزشىلاردىڭ جۇمىسى دا قاتاڭ قاداعالاۋدا. اتالعان تالاپتار فيرمالاردىڭ قاجىلار الدىنداعى جاۋاپكەرشىلىگىن ارتتىرا تۇسپەك»، - دەدى ول.

سونداي-اق، ا. ادىلبەكوۆ 2020 -جىلى بەرىلەتىن كۆوتا سانى قاجىلىق كەزىندە كورسەتىلگەن قىزمەتتىڭ ساپاسىنا بايلانىستى بولاتىنىن جەتكىزدى.

ەسكە سالا كەتسەك، بۇعان دەيىن قاجىلىق مىندەتىن وتەۋگە اتتانعان مىڭعا جۋىق وتانداسىمىزدىڭ قاسيەتتى مەككەگە جەتكەنىن حابارلاعان بولاتىنبىز.


اۆتور: داۋلەت ىزتىلەۋ

سوڭعى جاڭالىقتار