سولتۇستىك قازاقستان وبلىسىندا ارنايى جاساق قىزمەتكەرلەرى بالالارعا قويان- قولتىق ايقاس ادىستەرىن كورسەتتى

پەتروپاۆل. قازاقپارات - سولتۇستىك قازاقستان وبلىسىندا جەدەل ارەكەت ەتۋ ارنايى جاساعىنىڭ قىزمەتكەرلەرى «جاس ارلان» اسكەري- پاتريوتتىق كلۋبىنىڭ جاس تالىمگەرلەرىمەن كەزدەستى، دەپ حابارلايدى قازاقپارات.

پوليتسيا دەپارتامەنتى باسپا ءسوز قىزمەتىنىڭ اقپاراتى بويىنشا، پوليتسەيلەر 50 بالاعا ءوز كاسىبى تۋرالى ايتىپ، قارۋلاردى، ارنايى قۇرالدار مەن قىلمىسكەرلەردى ۇستاۋ امالدارىن كورسەتتى.

«ءبىز بالالارعا جۇمىسىمىزدى كورسەتىپ، قۇقىق قورعاۋ ورگاندارىنداعى قىزمەت تۋرالى ايتتىق. بۇگىنگى كەزدەسۋدىڭ ماقساتى - بالالارعا پوليتسيا قىزمەتكەرلەرىنىڭ قوعام يگىلىگى ءۇشىن كۇن سايىن جاۋاپتى قىزمەت اتقارىپ جۇرگەنى تۋرالى حاباردار ەتۋ. بالالاردىڭ وتانعا دەگەن ماحابباتى، پاتريوتتىق سەزىمى ويانعانى قۋانتىپ وتىر»، - دەدى جەدەل ارەكەت ەتۋ ارنايى جاساعىنىڭ اعا ينسپەكتورى ەرلان بازاربايەۆ.

بالالارعا قارۋ قولدانۋ ارقىلى كورسەتىلگەن ادىستەر ەرەكشە اسەر ەتتى. جاس ارلاندىقتار پوليتسيا وفيتسەرلەرى ۇيرەنەتىن، جاتتىعاتىن جانە كەزەكشىلىك ەتەتىن سپورتزال، وقۋ سىنىپتارى، سپورت تروفەيلەرى كورسەتىلگەن ستەندتەردى تاماشالادى.

«جاس ارلان» كلۋبى 2018 -جىلدىڭ كۇزىندە اۋعان جانە جەرگىلىكتى سوعىس ارداگەرلەرى وداعىنىڭ باستاماسىمەن اشىلدى.

جاس ارلان» اسكەري- پاتريوتتىق كلۋبىنىڭ باسشىسى ەرىك تاتتىبايەۆتىڭ ايتۋىنشا، كلۋبقا 100 دەن استام بالا بارىپ ءجۇر.

«بىزدەگى ساباقتار ءۇش باعىت بويىنشا وتەدى: العاشقى اسكەري دايىندىق، جالپى دەنە دايىندىعى مەن ءوزىن- ءوزى قورعاۋ. بارلىق نۇسقاۋشىلاردىڭ جوعارى بىلىمدەرى بار: دەنە شىنىقتىرۋ، پەداگوگيكالىق، اسكەري، زاڭگەرلىك. اسكەري- پاتريوتتىق كلۋبتاعى ساباقتار تەگىن وتەدى. وعان وتۋدەگى باستى تالاپ - مەديتسينالىق انىقتامانىڭ بولۋى»، - دەدى ە. تاتتىبايەۆ.